Bokosi La Mafumbu

◼ Kumbi ndi fundu wuli zo titenere kuziziŵa asani tikhumba kuti katundu widu munyaki pamwenga yosi waziperekeki ku gulu laku Yehova asani tafwa?

Asani munthu wafwa walivi mazaza ngengosi pa katundu waki. (Waku. 9:​5, 6) Ndichu chifukwa chaki anyaki alembe limu kalata [wilu] yakulongo mo katundu wazamugaŵikiya. (2 Ŵaka. 20:⁠1) Mu kalata iyi muja so zina la munthu yo wazamuja ndi udindu pa katundu winu asani yimwi mwafwa. Mu vyaru vinandi asani mwaleka kulembe limu mo katundu winu wazamugaŵikiya, ŵanthu wo ŵe ndi mazaza ndiwu agaŵa katundu yo. Mwaviyo, asani mukhumba kuti katundu winu munyaki pamwenga yosi waziluti ku gulu laku Yehova, nkhwakukhumbika kuti mulembi kalata yakulongo vo imwi mwasankha ndipuso kulemba zina la munthu yo mukhumba kuti wazije ndi udindu pa katundu winu asani imwi mwafwa.

Munthu yo mwamupasa mazaza pa katundu winu waja ndi udindu ukulu. Nchitu yakugaŵa katundu yingato nyengu yitali. Ŵaraŵara a boma ŵe ndi ulongozgi wo agwiriskiya nchitu pakugaŵa katundu. Ndi munthu weyosi cha mumpingu yo wangaŵa wakwenere kupaskika udindu wenuwu. Titenere kusankha munthu yo wangafiska, wakugomezgeka ndipuso yo wangalondo vo tikumukambiya.​—⁠Wonani nkhani yo ye pa peji 24 mpaka 27 mu Galamukani! yachingelezi ya December 8, 1998.

Asani Mwapempheka Kuti Muzije ndi Udindu pa Katundu wa Munthu Munyaki: Asani mwapempheka kuti muzije ndi udindu pakugaŵa katundu wa munthu munyaki asani iyu wafwa, mungachita umampha kuromba ndi kuŵanaŵaniya nchitu yo yiŵapu ndipuso kuwona asani mungafiska kugwira nchitu yeniyi. (Luka 14:​28-32) Asani munthu wafwa, mukhumbika kuziŵisa ŵanthu wosi wo akulembeka mazina kuti azilonde ndalama pamwenga katundu wa munthu yo wakufwa. Asani mwapaskika udindu wenuwu, ziŵani kuti nchitu yinu ya kugaŵa katundu pamwenga ndalama yikoliyani ndi marangu nga boma ndipuso mwakuyanana ndi mo mweneku wakulembe. Munthu yo wakupaskika udindu wakugaŵa katundu watenere kuziŵa kuti kaya katundu yo wakhumbika kumugaŵa ndi munandi pamwenga mumana watenere kulondo vo vikulembeka ndi mweneku wa katundu. Katundu weyosi yo wakuperekeka ku Akaboni aku Yehova ndi katundu wa Gulu laku Yehova.​—⁠Luka 16:10; 21:​1-4.