Kumbi Nchinthu Wuli cho Chitikukondweskani?
1. Kumbi nchinthu wuli cho chitikukondweskani kukumaliya kwa mwezi wewosi?
1 Kukumaliya kwa mwezi wewosi tipempheka kuti tipereki lipoti la uteŵeti wakumunda. Kumbi imwi mukondwa asani mupereka lipoti? (Ŵaga. 6:4) Kaya te apayiniya apade wo apereka maora 130 pamwezi pamwenga tikuzomerezgeka kupereka maminiti 15 chifukwa cha ukoti pamwenga kutama, tosi titenere kukondwa chifukwa cha kupereka ndi mtima wosi kwaku Yehova.—Sumu 100:2.
2. Nchifukwa wuli tikhumbika kujipereka pakuteŵete Yehova?
2 Nge Mbuya wa Chilengedu chosi, Yehova wakhumbika kulonde vinthu vamampha ukongwa. (Mala. 1:6) Chifukwa chakuti titimuyanja, tikujipatuliya kuti tichiti khumbu laki. Ndichu chifukwa chaki pakumaliya pa zuŵa lelosi pamwenga pa mwezi wewosi tija ndi chifukwa chakukondwe, asani tapereka “vipasi vakudankha” mwa kugwiriskiya nchitu nyengu yidu, chuma chidu ndi nthazi zidu pakuteŵete Yehova. (Ntha. 3:9) Kweni asani njuŵi yidu yititikambiya kuti tikhoza kuchita vinandi, ndikuti tikhumbika kuwona vo tingachita kuti tifiski uteŵeti widu.—Ŵaro. 2:15.
3. Nchifukwa wuli ndi zeru cha kujiyeruzgiyanga ndi ŵanthu anyaki?
3 Tingajiyeruzgiyanga ndi ‘Munthu Munyaki cha’: Ndi zeru cha kujiyeruzgiya ndi ŵanthu anyaki pamwenga kujiyeruzgiya ndi vo tachitanga kali. Vakuchitika pa umoyu visintha. Malusu ngayanana cha. Kujiyeruzgiya ndi ŵanthu anyaki kanandi kutambisa maphara pamwenga kujivwa kuti palivi cho tichita. (Ŵaga. 5:26; 6:4) Yesu wayeruzgiyanga ŵanthu cha. M’malu mwaki wawonganga munthu weyosi mwakukoliyana ndi vo wafiska kuchita.—Marko 14:6-9.
4. Kumbi ntharika yaku Yesu ya matalente yititisambizanji?
4 Mu ntharika yaku Yesu ya matalente, wanchitu weyosi wangupaskika matalente “kwakulingana ndi nthazi yakuyija.” (Mate. 25:15) Mbuyawu wati waza ndi kufumba mo nchitu yayende, wo angugwira nchitu mwaphamphu mwakulingana ndi lusu lawu kweniso vakuchitika va paumoyu wawu, anguwongeka ndipu angukondwe limoza ndi mbuyawu. (Mate. 25:21, 23) Asani nasi titangwamika ndi nchitu ya kupharazga Ufumu, tiŵengi ndi chigomezgu chosi kuti Yehova watiyanjengi ndipuso tijengi akukondwa.