Yezgani Achimi—Hoseya
1. Kumbi mutenere kuti mukujifumbapu fumbu nili?
1 ‘Kumbi ndi vinthu wuli vo ndikhumba kumuchitiya Yehova?’ Akhumba mukujifumbapu fumbu lenili pa nyengu yo mwalungurukanga vinthu vamampha vo Yehova wachita ndipuso lisungu laki. (Sumu 103:2-4; 116:12) Hoseya wanguchita vo Yehova wangumukambiya kuti wachiti chinanga kuti wakhumbikanga kujipereka ndi mtima wosi. Kumbi tingamuyezga wuli Hoseya?
2. Kumbi tingamuyezga wuli Hoseya pa nkhani ya kukunthiyapu asani tipharazga?
2 Tipharazgengi Chinanga Yingaŵa Nyengu Yakusuzga: Uthenga waku Hoseya walutanga ukongwa ku ufumu wa Yisraele wa mafuku 10, wo wenga pafupi kuleke limu kusopa kwauneneska. Karonga Yeroboamu Wachiŵi wanguchita vinthu viheni pamasu paku Yehova ndipu wangulutirizga kusopa chikozgu cha mwana wa ng’ombi cho Yeroboamu Wakwamba wangupanga. (2 Ŵakar. 14:23, 24) Mafumu ngo nganguza pavuli paki nangu ngangulutirizga kuchita vinthu viheni mu ufumu wa mafuku 10 mpaka po ungubwangandulikiya mu 740 B.C.E. Chinanga kuti kusopa kwa boza kunguwanda ukongwa panyengu yo, Hoseya wateŵetiyanga mwakugomezgeka nge mchimi kwa vyaka pafufupi 59. Kumbi nasi tiyesesengi kupharazga chaka chechosi chinanga kuti ŵanthu angaleka kuvwisiya pamwenga angatisuska?—2 Tim. 4:2.
3. Kumbi vo wanguchita Hoseya vilongo wuli lisungu laku Yehova?
3 Muŵanaŵaniyengi Lisungu Laku Yehova: Yehova wangukambiya Hoseya kuti wato Gomere, “munthukazi mureŵi.” (Hos. 1:2) Chinanga kuti wangubalirana nayu mwana munthurumi yumoza, viwoneka kuti pavuli paki Gomere wanguzibala so ŵana ŵaŵi a padondu. Hoseya wamugowokiyanga ndi mtima wosi muwolu waki, ndipu ivi vamiyanga lisungu lo Yehova walongonga Ayisraele asani alapa. (Hos. 3:1; Ŵar. 9:22-26) Kumbi tikhumbisiska kusiya dankha vakukhumba vidu kuti tiwovyi ŵanthu a mitundu yosi kuti aziŵi lisungu lo Yehova wenalu?—1 Ŵakor. 9:19-23.
4. Kumbi tingaleka vinthu wuli kuti titeŵete umampha Yehova?
4 Ateŵeti anyaki aku Yehova aleka nchitu zawu za ndalama zinandi kuti achiti vinandi mu uteŵeti. Anyaki mbambula kuyirwa pamwenga kuto ndipu anyaki alivi ŵana kuti agwiri umampha nchitu za Ufumu. Asani tiŵanaŵaniya vo Hoseya wanguchita, tikhoza kukamba kuti, ‘Ini pe ndingafiska cha.’ Kweni asani tilutirizga kwanja Yehova chifukwa cha lisungu laki likulu ndipuso kuthemba mzimu waki kuti utipaski nthazi, watigwiriskiyengi nchitu kuti tichiti vinthu vo tingaviwona nge kuti tingavifiska cha nge mo wanguchitiya ndi Hoseya.—Mat. 19:26; Ŵaf. 2:13.