Bokosi La Mafumbu

◼ Nchifukwa wuli titenere kuphwere asani munthu yo tasaniya mu uteŵeti pamwenga yo tayenda nayu ndi munthukazi pamwenga munthurumi munyidu cha?

Tiziŵa umampha kuti abali ndi azichi widu ayesesa kulondo marangu nga mijalidu yamampha pa umoyu wawu. Kweni tija m’charu cho chazaza ndi mijalidu yiheni. Chinanga kuti tingaja ndi vilatu vamampha, tikhumbika kuphwere nyengu zosi kuti tileki kunyozesa zina laku Yehova chifukwa chakuchita mijalidu yiheni. Ivi ving’anamuwa so kuchita vinthu mwakuphwere asani te mu uteŵeti.

Mu uteŵeti wakumunda tikumana ndi ŵanthu akupambanapambana wo akhumba kusambira uneneska, anthurumi pamwenga anthukazi. Asani tayenda tija ndipu pakhomu tasaniyapu munthu yumoza pe yo ndi munthurumi pamwenga muthukazi munyidu cha, tingachita umampha kusambiriya nayu pabwalu m’malu mwakusere nayu munyumba. Asani munthu yo ngwakunweka, paulendu wakuweriyaku tiziyendi ndi mupharazgi munyidu pamwenga tiziluti pa nyengu yo tingachimusaniya kuti we ndi anyaki. Asani mphakusuzga kuchita viyo, mungatumaku mupharazgi yo ndi munthukazi pamwenga munthurumi munyaki. Ulongozgi uwu ugwira so nchitu asani musambiza Bayibolo munthu yo ndi munthurumi pamwenga munthukazi munyinu cha.—Mat. 10:16.

Tikhumbika so kuphwere ukongwa asani tisankha munyidu wakuti tiyendi nayu mu uteŵeti. Chinanga kuti nyengu zinyaki mupharazgi munthurumi ndi munthukazi angayende limoza, kweni vingaja umampha asani apharazga nge gulu. Kweniso tikhumbika cha kuja nyengu yitali mu uteŵeti wakumunda ndi munthukazi pamwenga munthurumi yo tikutorana nayu cha. Mwaviyo, m’bali yo wanozgekereska kagulu ka uteŵeti wakumunda watenere kuchita vinthu mwazeru asani wagaŵa apharazgi kuti ayende limoza. Watenere so kuchita vinthu mwazeru asani wagaŵa anyamata ndi asungwana.

Asani nyengu zosi tichita vinthu mwazeru, tiguŵengi cha pamwenga ‘kuguŵiska’ anyidu.—2 Ŵakor. 6:3.