Mufikengi Liŵi pa Maunganu
1. Kumbi Yehova walongo wuli kuti wachita vinthu pa nyengu yaki?
1 Yehova wasunga nyengu. Mwakuyeruzgiyapu, iyu watovya ateŵeti ŵaki pa “nyengu yakwenere.” (Ŵah. 4:16) Watiŵapaska so “chakurya [chauzimu] pa nyengu yaki.” (Mat. 24:45) Mwaviyo, tikayika cha kuti zuŵa laki lakofya liswerengi cha. (Hab. 2:3) Nasi tiyanduwa ukongwa chifukwa chakuti Yehova wachita vinthu pa nyengu yaki. (Sumu 70:5) Nyengu zinyaki titondeka kuchita vinthu pa nyengu yaki chifukwa chakuti titangwamika kweniso te ambula kufikapu. Nchifukwa wuli tikhumbika kuchita vinthu pa nyengu yaki?
2. Kumbi Yehova watumbikika wuli asani tichita vinthu pa nyengu yaki?
2 Mazuŵa nganu ngakumaliya, ŵanthu anandi achita vinthu pa nyengu yaki cha chifukwa chakujanja kweniso kuleka kujikanizga. (2 Tim. 3:1-3) Mwaviyo, asani Mkhristu watesesa kufika liŵi kunchitu, ku maunganu ndipuso asani wakumana liŵi ndi ŵanthu wo wapangana nawu, anyaki awonga ndipu vichitiska kuti Yehova watumbikikengi. (1 Pet. 2:12) Kumbi nyengu zosi tiswera ku maunganu kweni kunchitu yidu ndiku tifika liŵi? Asani tifika mwaliŵi ku maunganu ngachikhristu sumu ndi rombu vechendayambi, tilongo kuti tikhumbisiska kulondo Awuskefwi akuchanya wo asunga nyengu.—1 Ŵakor. 14:33, 40.
3. Nchifukwa wuli kuchita vinthu pa nyengu yaki kulongo kuti tiŵanaŵaniya anyidu?
3 Asani tisunga nyengu tilongo so kuti tiŵanaŵaniya anyidu. (Ŵaf. 2:3, 4) Mwakuyeruzgiyapu, Akhristu anyidu angaguŵa cha asani tifika liŵi ku maunganu ngampingu ndipuso ngakunozgeke uteŵeti wakumunda. Kweni asani tikuziŵiliya kuswera, anyidu angawona kuti, tiwona kuti nyengu yidu njakukhumbika ukongwa kuluska yawu. Asani tichita vinthu pa nyengu yaki, tilongo kuti te akugomezgeka ndipuso aphamphu. Ŵanthu akondwa ndi mijalidu yeniyi.
4. Nchinthu wuli cho chingatiwovya kuti tilekengi kuswera?
4 Asani nyengu zosi muswera, yesesani kuziŵa chifukwa cho muswere. Jani ndi ndondomeku yakwenere kuti muchitengi vinthu pa nyengu yaki. (Wak. 3:1; Ŵaf. 1:10) Pemphani Yehova kuti wakuwovyeni. (1 Yoh. 5:14) Asani tichita vinthu pa nyengu yaki, tilongo kuti tivwiya Marangu ngaŵi ngakulungakulu ngo ngakamba kuti titenere kwanja Chiuta kweniso anyidu.—Mat. 22:37-39.