Vipharazgu

◼ Mabuku ngakugaŵiya mu July: Gaŵiyani kamoza mwa timabuku tamapeji 32 takuti: Uthenga Wamampha Wakutuliya Kwaku Chiuta, Vwiyani Chiuta Kuti Muje ndi Umoyu Wamuyaya, Kumbi Chiuta Watitiŵanaŵaniya Nadi? pamwenga Mungathe Kukhala Bwenzi la Mulungu! August: Tazamugaŵiya kapepala kafya ko kakonkhoska mo tingagwiriskiya nchitu Webusayiti ya jw.org. September ndi October: Magazini nga Chigongwi cha Alinda ndi Galamukani!

◼ Musabata ya unganu wachigaŵa mukhumbika cha kuchita maunganu nga mpingu. Venivi viwovyengi kuti abali ndi azichi anozgeke umampha. Sabata ya pavuli, unganu wechendachitiki, sinthani ndondomeku ya unganu wa uteŵeti kuti mukambiskani nkhani izi: “Muŵi ndi Kajalidu Kakutowa mu Amitundu,” “Mudanu Wapade,” fundu zo ze mu mphatika yo ye mu Uteŵeti Widu wa Ufumu wenuwu kweniso kalata ya pa August 3, 2013, yo yikuluta ku mipingu yosi. Kalata yeniyi yikamba vo mungachita kuti muleki kuchita ngozi asani mwe pa unganu wachikhristu. Asani mwezi umoza pamwenga yiŵi yakapu kutuliya po muchitiyengi unganu wachigaŵa, pa nkhani yakovya mpingu, muzikambiskani fundu zo apharazgi awona kuti zakovya mu uteŵeti zo azamusambira pa unganu wachigaŵa.