Gwiriskiyani Nchitu Mpata wo Mwenawu Kuti Muwandisiyi Uthenga wa Ufumu!

1. Kumbi tisambiranji pa vo Davidi wanguchita?

¹ Davidi yo wenga fumu wanguzomerezga cha kuti vinthu vo vingumuchitikiya vimugongowesi. Mwakuyeruzgiyapu, iyu wakhumbanga kuzenge Yehova nyumba. Yehova wati wamukaniza, Davidi wangusintha vo wakhumbanga kuchita ndipu wanguwovya Solomoni kuwunganiska vinthu vakuzenge nyumba yakusopiyamu. (1 Ŵakar. 8:17-19; 1 Mik. 29:3-9) M’malu mwakuŵanaŵaniya vinthu vo wangutondeka kufiska, wanguŵanaŵaniya vinthu vo watingi wafiskengi. Kumbi tingalondo wuli chakuwoniyapu chaku Davidi po tikhumba kusaniya nthowa zakuwandisiya uthenga wa Ufumu?

2. Kumbi tikhumbika kujisandanji?

² Chitani vo Mungafiska: Anandi asintha vinthu pa umoyu wawu kuti achiti upayiniya wakovya pamwenga wa nyengu zosi. (Mat. 6:22) Kumbi namwi mungachita viyo? Po muromba kuti musandi mo vinthu viliri pa umoyu winu, muwonengi kuti “khomu likulu la mlimu” ndakujulika. Asani ndi viyo, gwiriskiyani nchitu mpata weniwo!—1 Ŵakor. 16:8, 9.

3. Kumbi tingachitanji kuti tipharazgi chinanga kuti tingatondeka kuchita upayiniya?

³ Nchinthu wuli cho mungachita asani pe vinthu vo vitikutondekeskani kuchita upayiniya? Mungalekanga cha kugwiriskiya nchitu mpata wo mwasaniya. Mwakuyeruzgiyapu, asani mwakumana ndi ŵanthu ambula chivwanu kunchitu kwinu, gwiriskiyani nchitu mpata wo ulipu kuŵapharazgiya. Asani mutama mungagwiriskiya nchitu mpata wo ungasanirika kupharazga ku ŵanthu wo atikuwovyani kuchipatala? Kumbukani kuti pe mwaŵi wakuti wo atondeka kupharazga nyengu yitali chifukwa cha kukota pamwenga matenda ngakulu, aperekengi maminiti 15 pa mwezi. Pakulemba pa lipoti linu la uteŵeti, mukumbukengi kusazgapu nyengu yo mwapharazga mwamwaŵi, mabuku ngo mwagaŵiya, timapepala to tigaŵiya nyengu zosi, timapepala takudaniya ŵanthu ku Chikumbusku ndipuso ku unganu wachigaŵa. Asani mungasazga pamoza nyengu yo mwawonanga kuti njimana, muwonengi kuti yiŵengi yinandi!

4. Kumbi mukhumbisiska kuchitanji?

⁴ Kaya vinthu ve wuli pa umoyu widu, tiyeni tiyesesi kugwiriskiya nchitu mwaŵi wo tenawu kuwandisiya uthenga wamampha. Asani tingachita viyo, tiŵengi akukondwa kuziŵa kuti tichita vosi vo tingafiska chifukwa cha Ufumu.—Marko 14:8; Luka 21:2-4.