Kumbi Tingawovya Wuli Abali Ŵidu?
1 Tanandi te ndi abali ŵidu wo mbakaboni cha. Tikhumbisiska kuti nawu ayambi kwenda panthowa yakuluta ku umoyu. Titiŵafipiya mtima ukongwa chifukwa tikhumba kuti azisaniyi umoyu wamuyaya. Chinanga kuti taŵapharazgiya kwa vyaka vinandi, kweni tingavukanga cha.
2 Yesu nayu wagwiranga ntchitu yakupharazga kweni “abali ŵaki amugomezganga cha.” (Yoh. 7:5) Nyengu yinyaki, abali ŵaki amukambanga kuti wafuntha. (Marko 3:21) Kweni wanguleka cha kuŵapharazgiya. Pati pajumpha nyengu, abali ŵaki angusambira uneneska. (Mac. 1:14) Mvurwa waki Yakobe wanguzija muzati mumpingu wachikhristu. (Ŵag. 1:18, 19; 2:9) Asani mukhumba kuti abali ŵinu asambiri uneneska, mungachitanga mphwayi cha kuŵasambiza uthenga wamampha wa Ufumu.
3 Mungaŵasambizanga Vinthu Vinandi Cha: Ŵanthu wo Yesu waŵapharazgiyanga akondwanga ukongwa ndi uthenga waki. (Mat. 11:28, 29) Iyu waŵasambizanga vinthu vipusu. Kuti muwovyi abali ŵinu kuti asambiri uneneska, muŵasambizengi vinthu vimanavi pa nyengu yimoza. Wakuwonere dera munyaki wangukamba kuti: “Ŵanthu anandi asambira uneneska chifukwa chakuti abali ŵawu aŵasambizanga vinthu vimanavi pa nyengu yimoza.” Ivi vitovya kuti ŵanthu wo asuska nawu ayambi kuja ndi mtima wakukhumba kusambira uneneska ndipu atamba kufumba mafumbu.—1 Pet. 2:2; yeruzgiyani ndi 1 Ŵakorinte 3:1, 2.
4 Akhristu anandi wo akutorana ndi munthu yo ndi Kaboni cha apharazgiya munyawu mwakuŵika pakweru mabuku ngo awona kuti nge ndi nkhani zo wangakondwa nazu. Mzichi munyaki wasambiranga Bayibolu ndi ŵana ŵaki. Iyu waŵasambizanga munthowa yakuti mulumu waki wavwengeku. Wakonkhoskanga mwakuvwika umampha kuti mulumu waki nayu wayanduwengi. Nyengu zinyaki wakambiyanga mulumu waki kuti: “Musanawale ndasambira vinthu ivi po ndasambiranga Bayibolu.” Pavuli paki, wamufumbanga kuti: “Muŵanaŵana wuli?” Zuŵa linyaki, mulumu waki wanguzomera kusambira uneneska.
5 Muchitengi Vinthu Mwaulemu: Mupharazgi munyaki wangukamba kuti “abali ŵidu nawu ŵe ndi wanangwa pa vinthu vo agomezga.” Mwaviyo, titenere kuŵapasa ulemu asani akamba maŵanaŵanu ngawu kweniso asani atitikaniza kuŵapharazgiya. (Wak. 3:7; 1 Pet. 3:15) Asani tichita vinthu mwakuzikira, mwachanju kweniso asani tivwisiya vo akamba tingasaniya mwaŵi wakuŵapharazgiya mwazeru. M’bali munyaki wanguyanduwa chifukwa chakuti wenga wakujiko. Muwolu waki wangumuchitiya nkhaza kwa vyaka 20. Muwolu waki wati wayamba kusintha, m’bali uyu wangukamba kuti: “Nditimuwonga ukongwa Yehova chifukwa wangundiwovya kuti ndikunthiyengepu. Sonu ndiwona kuti vo ndachitanga vawovya muwolu wangu kuti wasambiri uneneska.”
6 Kumbi nchinthu wuli cho chingawovya abali ŵinu kuti asambiri uneneska? Nyengu zinyaki angakopeka ndi nkharu yinu yamampha. Kweniso mukhumbika kuŵarombe kuti aziŵi Yehova.—1 Pet. 3:1, 2.