Kumbi Muyanduwa ndi Kukambiskana Malemba Zuŵa Lelosi?

Kumbi muwona kuti kuŵerenga lemba kweniso ndemanga za mukabuku ka Kukambiskana Malemba Zuŵa Lelosi kungakuwovyani kuti mulutirizgi kuja paubwezi ndi Yehova? Asani mwechedayambepu, mungachita umampha kwambapu. Anandi awona kuti mulenji ndiyu nyengu yamampha ukongwa yakuchitiya lemba la zuŵa chifukwa vitiŵawovya kuti alungurukengi fundu zo asambira achichita ntchitu zawu za zuŵa ndi zuŵa. (Yoswa 1:8; Sumu 119:97) Kumbi mungachita wuli kuti muyanduwengi ukongwa ndi lemba la zuŵa? Muŵerengengi mavesi nganandiku muchaputala cho patuliya lemba lo kuti muvwisi umampha nkhani yaki yosi. Muyesesengi kuŵanaŵaniya so nkhani yinyaki ya mu Bayibolu yo yikonkhoska fundu yikulu ya lemba la zuŵa lo. Pavuli paki, wonani mo mungagwiriskiya ntchitu fundu yeniyo paumoyu winu. Tiyanduwengi ukongwa asani tizomereza Mazu ngaku Chiuta kuti ndingu ngatilongozgengi pa chechosi cho tikhumba kuchita paumoyu widu.​—Sumu 119:105.

Mabanja nga Beteli pacharu chosi ngachita lemba la zuŵa pa nyengu ya chakurya chamulenji. Mu vyaka vapambula kuswera yapa, nkhani zinandi zo zikambika pa lemba la zuŵa ziŵikika pa JW Broadcasting^® pachigaŵa chakuti VAKUCHITIKA. Kumbi mukuvwisiyapu nkhani zenizi? Nyengu zinyaki mungasaniya nkhani chayiyu yo yingakuwovyani. Mwakuyeruzgiyapu, kumbi nkhani yaku Loti yingakuwovyani wuli asani musankha vakuchita?

WONERIYANI VIDIYO YAKUTI MUNGAYANJANGA CHARU CHA (1 YOHA. 2:15), PAVULI PAKI MUKANI MAFUMBU YANGA:

• Kumbi ndi fundu za mu Bayibolu nizi zo zingukonkhoskeka pa Kusopa kwa Mulenji?

• Kumbi nkhani yaku Loti yilongo wuli kuti kwanja vinthu va mucharu ichi nkhwakofya?​—Chiya. 13:12; 14:12; 19:3, 12, 13, 24-26

• Kumbi tingalongo wuli kuti titanja Yehova mumalu mwa vinthu va mucharu ichi?