Yesu “Wangusambira Kuvwiya”

Kwamba kali, Yesu wavwiyanga Yehova. (Yoha. 8:29) Nanga ntchifukwa wuli Bayibolu likamba kuti: “Wangusambira kuvwiya chifukwa cha masuzgu ngo wangukumana nangu”?—Ahe. 5:8.

Pa nyengu yo Yesu wenga pacharu chapasi wangukumana ndi vinthu vo wenga wechendakumanepu navu kuchanya. Mwakuyeruzgiyapu, wangulereka ndi apapi wo ayanjanga Yehova kweni ŵenga ambula kufikapu. (Luka 2:51) Alongozgi achinyengu a visopa vaboza kweniso ŵaraŵara aboma amuchitiyanga vinthu vambula urunji. (Mate. 26:59; Mariko 15:15) Kweniso iyu wangufwa nyifwa yakuŵaŵa ukongwa, mwakuti Bayibolu likamba kuti: “wangujiyuyuwa ukongwa ndipu wanguja wakuvwiya mpaka nyifwa.”—Afi. 2:8.

Masuzgu ngenanga ngo Yesu wangukumana nangu ngangumusambiza kuvwiya munthowa yo watingi wasambirengi cha pa nyengu yo wenga kuchanya. Venivi vingumuwovya kuti waje Fumu kweniso Wasembi Mura wamampha yo watitivwiya lisungu. (Ahe. 4:15; 5:9) Chifukwa chakuti Yesu wangukunthiyapu masuzgu ngo wangukumana nangu ndipu wangusambira kuvwiya, Yehova wangumuwona kuti ngwakuzirwa ukongwa. Nasi Yehova wangatiwona kuti te akuzirwa kweniso wangatigwiriskiya ntchitu pa mauteŵeti ngakupambanapambana asani tilutirizga kuvwiya kwali tingakumana ndi masuzgu wuli!—Yako. 1:4.