Sambiru Limoza Linguchitiska Kuti Ŵanthu Anandi Ayambi Kusambira Bayibolu

Marta, yo ndi Kaboni waku Yehova ndipu waja ku Guatemala, wasambira chineneru cha Chikekichi kuti waŵapharazgiyengi uthenga wa mu Bayibolu ŵanthu wo alongoro chineneru chenichi. Zuŵa linyaki wanguwona munthulumi munyaki yo watuwanga ku chipatala. Chifukwa cha mo wawonekiyanga, Marta wanguziŵa kuti munthu mwenuyu wangutuliya mumuzi wa ŵanthu wo alongoro Chikekichi wo we kumapiri, ko Akaboni aku Yehova apharazgaku kaŵikaŵi cha. Marta wanguluta po penga munthu mwenuyu ndipu wangwamba kukambiskana nayu chinanga kuti wachiziŵanga ukongwa cha chineneru chenichi.

Marta wangupempha munthu mwenuyu kuti wasambirengi nayu Bayibolu. Iyu wanguzomera ndi mtima wosi kweni wangukamba kuti walivi ndalama za kulipiriya sambiru lenili. Marta wangumukonkhoske kuti Akaboni aku Yehova asambira Bayibolu ndi ŵanthu kwawezi. Marta wangumukambiya so kuti wangasambira nayu Bayibolu pafoni ndipu banja laki losi lingaŵapu. Munthu uyu wanguzomera. Chifukwa chakuti iyu waziŵanga kulongoro ndi kuŵerenga Chisipanishi, Marta wangumupaska Bayibolu la New World Translation of the Holy Scriptures la Chisipanishi. Marta wangupaska so munthu mwenuyu buku lakuti Kumbi Bayibolo Lisambizanji Weniukongwa? la Chikekichi. Sabata yakulondopu, iyu, muwolu waki kweniso ŵana ŵawu ŵaŵi angwamba kusambira Bayibolu ndi Marta kuziya pa foni. Yiwu asambiranga Bayibolu kaŵi pa sabata. Marta wangukamba kuti: “Chifukwa chakuti ndachiziŵanga ukongwa cha Chikekichi, tasambiranga mu Chisipanishi ndipu iyu wafwatuliyanga muwolu waki vo takambiskananga. Ŵana ŵawu achiziŵanga Chisipanishi.”

Munthu mwenuyu wenga mliska ku tchalitchi kwaki. Iyu wangwamba kusambiza ŵanthu a ku tchalitchi kwaki vo wasambiranga pa sambiru la Bayibolu. Ŵanthu ŵenaŵa anguviyanja vo wanguŵasambiza ndipu angumufumba kuti aziŵi ko wavisambiranga. Wati waŵakambiya va sambiru la Bayibolu, yumoza ndi yumoza, wangwamba kujapu pa sambiru la Bayibolu. Pambula kuswera, ŵanthu akujumpha 15 asambiranga Bayibolu ndi Marta kuziya pa foni sabata yeyosi. Mukuluta kwa nyengu, aŵikanga mayikulofoni pafupi ndi foni kuti weyosi wavwengi.

Marta wati wakambiya ŵara a ku mpingu waki vakukwaskana ndi sambiru la Bayibolu lenili, mura yumoza wanguluta kumuzi wo kwajanga munthu yo wasambiranga Bayibolu. Iyu wanguŵadana kuti akaŵepu pa nkhani yo wakuwonere dera a watingi wakakambengi kumuzi wo wenga pa mtunda wakwenda ora limoza pa galimotu ndipu pavuli paki kwenda maora ngaŵi wapasi. Ŵanthu wo asambiranga Bayibolu anguzomera kuti amuŵapu ndipu 17 aku yiwu angufika nadi.

Pati pajumpha masabata, wakuwonere dera ndi akaboni anyaki, anguchija mazuŵa nganayi ndi ŵanthu wo asambiranga Bayibolu. Ndi mlenji, awoneriyanga mavidiyo ngo ngakonkhoska vo Bayibolu likamba nga mu chineneru cha Chikekichi ngo ngenga pa jw.org, ndipuso asambiranga kabuku kakuti, Kumbi Mbayani wo Achita Khumbu Laku Yehova Mazuwa Nganu? Ndi msana, awoneriyanga vigaŵa vinyaki va JW Broadcasting. Wakuwonere dera wangunozga so kuti munthu weyosi yo wasambiranga, waje ndi msambizi waki wa Bayibolu.

Pa mazuŵa nganayi ngenanga, Akaboni apharazganga kuvigaŵa va pafupi ndi kwenuku ndipu adaniyanga ŵanthu ku unganu wapade. Pa unganu wenuwu, abali angupempha ŵanthu 47 wo anguwungana kuti nawu aje ndi sambiru lawu la Bayibolu. Mabanja 11 nganguzomera kusambira.

Pati pajumpha myezi yimanavi, ŵara angunozga vakuti kumuzi wa munthulumi yuwa wangwamba kusambira Bayibolu, kuchitikengi maunganu kukumaliya kwa sabata yeyosi. Mazuŵa nganu, ŵanthu pafufupi 40 awungana kaŵikaŵi. Ndipu abali ŵati anozga kuti kwenuku kuchitiki Chikumbusu cha nyifwa yaku Yesu, angukondwa ukongwa kuti ŵanthu 91 anguwungana.

Asani wakumbuka mo venivi vingwambiya kweniso mo ŵanthu anandi angwambiya kusambira Bayibolu, Marta wakamba kuti: “Nditimuwonga ukongwa Yehova. Nyengu zinyaki nditijivwa kuti ndingachita vinandi cha. Kweni te vidya mumanja ngaku Chiuta. Iyu wanguziŵa vo venga mumitima ya ŵanthu a kwenuku ndipu wanguŵaguziya ku ŵanthu ŵaki. Yehova watiŵayanja.”