Kumwemwete Ndi Mphasu yo Mungapasaku Anyinu

KUMBI muchita wuli asani munthu munyaki watikumwemwetiyani? Kanandi namwiso mutimumwemwete. Ndipuso mukondwa ukongwa. Asani munthu yo titimuziŵa pamwenga yo tileka kumuziŵa watimwemwete, nasi titimumwemwete ndipu tituvwa umampha mumtima. Munthukazi munyaki zina laki Magdalena wangukamba kuti: “George yo wenga murumu wangu kweni sonu wakutayika, wayanjanga kumwemwete mwachanju. Asani taleresana, ndafwatukanga kweniso ndajivwanga kuti nde wakuvikiririka.”

Kumwemwete kulongo kuti munthu watuvwa umampha mumtima pamwenga kuti wakondwa. Magazini yinyaki ya pa intanenti (Observer) yingukamba kuti, “kumwemwete . . . ndi mphasu yo weyosi watuwa nayu.” Magazini iyi yingukamba so kuti, chinanga mbana wo awaku ŵaka “aziŵa asani munthu wamwemwete.” Yingulutiriza kukamba kuti: “Kumwemwete kutovya ŵanthu kuziŵa vo ve mumaŵanaŵanu pamwenga mumtima wa munthu kweniso kutiŵawovya kuziŵa mo atenere kuchitiya vinthu.”a

Ŵanthu wo achita kafukufuku pa Yunivesite ya Harvard ku United States, anguwona mo ŵanthu akukota wo atamanga achitiyanga vinthu chifukwa cha kumwemwete kwa madokotala. Yiwu angukamba kuti asani madokotala “ngamwemwete, ngalongo kuti ngalisungu ndipuso ngakwasika,” wo atamanga asweranga cha kuchila. Kweni venivi vachitikanga cha asani madokotala ngaleka kumwemwete.

Asani munthu wamwemwete, vitimuwovya so mweneku. Iyu wakondwa, watijiwona kuti wangafiska kuchita vinthu vinyaki pakuyija kweniso wasuzgika maŵanaŵanu cha. Kweni kukwiyakwiya kuchitisa kuti munthu walekengi kukondwa kweniso wasuzgikengi maŵanaŵanu.

KUMWEMWETE “KWANDIPASANGA NTHAZI”

Magdalena yo tamuzumbuwa kukwamba kwa nkhani iyi wenga yumoza wa Akaboni aku Yehova pa nyengu yo Nkhondu Yachiŵi ya Pacharu Chosi yachitikanga. Iyu limoza ndi ŵanthu anyaki a m’banja laki angutumizika ku jeri ya Ravensbrück ku Germany chifukwa chakukana kuja membala wa chipani cha Nazi. Iyu wanguti, “Nyengu zinyaki asilikali atikanizanga kulongoro ndi akaidi anyidu. Kweni angutondeka kutikaniza kumwemwete. Mwaviyo, kuwona waka kuti ama ndipuso muku wangu amwemwete, kwandipasanga nthazi kweniso kwandichiskanga kuti ndilutirizi kukunthiyapu.”

Panyaki muwona kuti mungafiska cha kumwemwete chifukwa cha masuzgu ngo mukumana nangu pa umoyu winu. Kweni mukumbukengi kuti kumwemwete kutambiya mumaŵanaŵanu. (Nthanthi 15:15; Ŵafilipi 4:8, 9) Mwaviyo, chinanga kuti mukumana ndi masuzgu, mutenere kuŵanaŵaniyanga vinthu vamampha vo vitikuchitikiyani.b Kuŵerenga Bayibolu ndipuso kupemphera, kwawovya ŵanthu anandi kuti achitengi venivi. (Mateyu 5:3; Ŵafilipi 4:6, 7) Mazu ngakuti “kukondwa” kweniso “likondwa” ndi nganyaki ngakuyanana ndi ngenanga, ngasanirika maulendu nganandi mu Bayibolu! Mungachita umampha kuŵerenga peji limoza pamwenga ngaŵi zuŵa lelosi. Asani mungachita viyo, panyaki namwi mungayamba kumwemwete zuŵa lelosi.

Mutenere cha kulindiza kuti anyinu ndiwu ayambengi kukumwemwetiyani. Muyambengi ndimwi, venivi vingachitisa kuti anyinu akondwi pa zuŵa lo. Asani muchitengi viyo, ndikwesa muwona kuti kumwemwete ndi mphasu yakutuliya kwaku Chiuta yo yitovya kuti imwi ndi ŵanthu anyaki wo mutiŵamwemwete akondwengi.