Nyumba za Nkhonu za Munyanja

NYUMBA za nkhonu za munyanja zitovya nkhonu kuti zileki kupwetekeka asani kwe mayiŵa kweniso ku vinthu vinyaki. Asayansi ŵati awona mo nyumba zenizi zivikiliya nkhonu, angwamba kusambira mo zikupangikiya. Yiwu anguchita ivi kuti aziŵi mo angapangiya magalimotu ndipuso mo angazenge nyumba zo zingavikiliya ŵanthu.

Ŵanaŵaniyani ivi: Asayansi ŵenaŵa angusambira mitundu yiŵi ya nyumba za nkhonu. Wakwamba, nyumba za nkhonu zo ze ndi vigaŵa viŵi. Ndipu wachiŵi, nyumba za nkhonu zakuzunguliya.

Asayansi angusaniya kuti mizeri ya nyumba za nkhonu zo ze ndi vigaŵa viŵi yiluta pamalu ngo vigaŵa venivi vikulumikizana. Kweni nyumba za nkhonu zakuzunguliya zikulama ukongwa pakati. Mitundu yosi yiŵi yeniyi yikupangika kuti mayiŵa pamwenga vinthu vinyaki vifikiyengi pa chigaŵa chakulama ukongwa. Venivi vitovya kuti nkhonu zivikilirikengi.

Asayansi anyaki anguchita kafukufuku kuti asimikizi asani nyumba za nkhonu zakulama nadi. Kuti achiti venivi, anguyesere pa nyumba za nkhonu chayizu ndi nyumba zinyaki za nkhonu zo anguchita kupanga. Yiwu angusaniya kuti nyumba za nkhonu chayizu zenga zakulama ukongwa, mwakuti nyumba zakuchita kupanga zabiliyangamu kaŵi.

Pakukonkhosa za kafukufuku mwenuyu, buku linyaki la sayansi likamba kuti: “Asani tingapanga galimotu yakuwoneka nge nyumba ya nkhonu, yingaja yakutowa ukongwa kweniso yingavikiriya ŵanthu wo akweramu.”—Scientific American.

Kumbi imwi muwona wuli? Kumbi vikuchitika ŵaka vija kuti nyumba za nkhonu za m’nyanja zije zakulama viyo? Pamwenga walipu yo wakuzilenga?