12 Kuja ndi Vilatu

KUMBI KUNG’ANAMUWANJI?

Kuja ndi vilatu kusazgapu vinandi kuluska ŵaka vinthu vo ukhumba kuti vichitiki. Kusazgapu kunozgeke, kuja wakunozgeka kusintha kweniso kuchita chechosi mwandondomeku yaki.

Vilatu vinyaki vingaja va kanyengu kamanavi ndipu vingafiskika asani pajumpha ŵaka mazuŵa pamwenga masabata. Vinyaki vingaja va nyengu yitaliku ndipu vingafiskika asani pajumpha myezi. Penipo vinyaki vingaja va nyengu yitali ndipu vingafiskika asani pajumpha chaka chimoza pamwenga vyaka vinandi. Vilatu vikuluvikulu vifiskika asani vilatu vimanavimana vafiskika.

NTCHIFUKWA WULI NKHWAKUKHUMBIKA?

Asani vilatu vo munthu wenavu vafiskika vitovya kuti walekengi kujikayikiya, ubwezi waki ndi anyaki uja wakukho kweniso wakondwa ukongwa.

Mutijikayikiya cha: Asani munthu wafiska vilatu vimanavimana watijikayikiya cha kuti wangafiska so vilatu vikuluvikulu. Kweniso vitimuwovya kumalana ndi masuzgu ngo wangakumana nangu nge kuchichizgika ndi anyaki kuti wachiti vinthu viheni.

Mutanjana ukongwa ndi mabwezi nginu: Ŵanthu akondwa ukongwa asani mabwezi ngawu nge ndi vilatu vamampha kweniso ngatesesa kufiska vilatu vawu. Ndipu kuja ndi vilatu vakuyanana ndi mabwezi nginu ndi nthowa yamampha yo yingakuwovyani kuti muyanjanengi ukongwa.

Mukondwa ukongwa: Munthu wakondwa ukongwa asani wafiska vilatu vo wenga navu.

“Nditanja kuja ndi vilatu. Kuchita viyo kutindiwovya kuti ndichitengi vinthu vinandi kweniso kuti ndiŵanaŵaniyengi vinthu vo ndikhumba kufiska. Ndipu asani ndafiska vilatu vo ndenga navu, ndikondwa ukongwa ndipu ndikamba kuti, ‘Ee, vachitika nadi! Ndafiska nadi vo ndakhumbanga.’”—Christopher.

FUNDU YA M’BAYIBOLU: “Yo walindiza kuti mphepu pamwenga vuwa yileki dankha wapandengi cha, ndipu wavunengi so chechosi cha.”—Wakutaula 11:4, Today’s English Version.

VO MUNGACHITA

Kuti mufiski vilatu vo mwe navu, gwiriskiyani ntchitu fundu zo ze mumphata.

Ziŵani vilatu vinu. Lembani vilatu vo mukhumba kufiska. Pavuli paki sankhani vo mukhumba kwamba kufiska, vo mufiskengi kachiŵi, kachitatu kweniso vinyaki vosi.

Nozgekiyani. Pa chechosi cho mukhumba kufiska, chitani vinthu ivi:

• Jiŵikiyeni nyengu yo mukhumba kufiskiya vilatu vo.

• Lembani vinthu vo mukhumbika kuchita kuti mufiski vilatu vo.

• Ziŵiyani limu masuzgu ngo mungakumana nangu kweniso ŵanaŵaniyani vo mungachita kuti mumalani nangu.

Chitanipu kanthu. Kuti mufiski vilatu vinu, mungalindizganga cha kuti muziŵiyi limu chechosi chakukwaskana ndi vinthu vo mukhumba kuchita. Jifumbeni kuti, ‘Kumbi ndikhumbika kwamba kuchitanji kuti ndifiski chilatu chenichi?’ Asani mwachiziŵa, chitani chenicho. Pa fundu yeyosi, wonani vo mwafiska kuchita.

FUNDU YA M’BAYIBOLU: “Vakuchita va munthu waphamphu vifiskika nadi.”—Nthanthi 21:5.