Mu Ufumu Waku Chiuta ‘Mwazamuja Chimangu Chikulu’

Pambula kuswera yapa, Ufumu waku Chiuta wo ŵanthu awulindizga kwa nyengu yitali, wazamuchitiska kuti ŵanthu azijengi mwachimangu kweniso mwakukoliyana. Lemba la Sumu 72:7 likamba kuti,“kwazamuja chimangu chikulu.” Kweni kumbi Ufumu wenuwu wazamukwamba zukwanji kulamuliya charu chosi? Kumbi wazamulamuliya wuli? Nanga kumbi tingasaniya vitumbiku wuli chifukwa cha kuwusika ndi Ufumu wenuwu?

KUMBI UFUMU WAKU CHIUTA UZENGI ZUKWANJI?

Bayibolu likukambiya limu vinthu vo vichitika vo vilongo kuti Ufumu waku Chiuta wepafupi. Vinthu vo vichitika ‘ntchisimikizu’ cha kuŵapu kwa Ufumu wenuwu ndipu vinthu venivi visazgapu nkhondu, nja, matenda, vidilirisi kweniso kuleka kuvwiya marangu.—Mateyu 24:3, 7, 12; Luka 21:11; Chivumbuzi 6:2-8.

Uchimi unyaki wa m’Bayibolu ukamba kuti: “Mazuŵa ngakumaliya, kuŵengi nyengu zakusuzga ukongwa. Pakuti ŵanthu azamuja akujiyanja, akwanja ndalama, . . . ambula kuvwiya apapi, ambula kuwonga, ambula kugomezgeka, ambula chanju chakuwa nachu, ambula kukoliyana ndi anyawu, akukamba vinthu viheni va ŵanthu anyaki, ambula kujiko, akofya, akutinkha vamampha, . . . akujitukumuwa, akwanja masaza mumalu mwakwanja Chiuta.” (2 Timote 3:1-4) Ŵanthu anyaki akwamba kali kulongo mijalidu yeniyi. Kweni mazuŵa nganu, ndipu yawanda ukongwa.

Mauchimi ngenanga ngangwamba kufiskika kwambiya mu chaka cha 1914. Ndipu akulemba mbiri, ŵanthu akutchuka andali kweniso atolankhani, nawu akonkhoska mo vinthu visinthiya chaka chechosi. Mwakuyeruzgiyapu, wakulemba mbiri munyaki ku Denmark zina laki Peter Munch wangulemba kuti: “Ŵanthu aluwa cha vinthu vo vinguchitika pa nkhondu yo yinguchitika mu chaka cha 1914. Chaka chenichi chechendafiki, ŵanthu aŵanaŵananga kuti vinthu vayendanga umampha pacharu. Kweni kutuliya pa nyengu iyi, . . . pacharu pachitika masoka ngachilengedu, ŵanthu ajaliya waka kufipa mtima, kutinkhana ndipu kwekosi ŵanthu aja mwambula kuvikilirika.”

Kweni uthenga wamampha ngwakuti asani vinthu venivi vazijumphapu, pacharu pazamuja chimangu. Kweniso vinthu venivi vilongo kuti Ufumu wo wazamulamuliya charu chosi wepafupi ukongwa. Uwu ndi uthenga wamampha nadi. Ndipu Yesu wangukamba kuti mu mazuŵa nganu ngakumaliya “uthenga wamampha uwu wa Ufumu, wazamupharazgika pacharu chosi chapasi kuti uje ukaboni ku ŵanthu amitundu yosi, ndipu pavuli paki umaliru uzengi.”—Mateyu 24:14.

Uthenga wamampha wenuwu ndiwu nkhani yikulu ukongwa ya uthenga wo Akaboni aku Yehova apharazga. Yiwu agwiriskiya ntchitu ukongwa Chigongwi cha Alinda Chakupharazga Ufumu Waku Yehova pa mabuku ngosi ngo agwiriskiya ntchitu. Ndipu magazini yeniyi sonu yisanirika mu vineneru vakujumpha  338. Kanandi magazini ya Chigongwi cha Alinda yikonkhoska vinthu vamampha vo Ufumu waku Chiuta wazamuchitiya ŵanthu pacharu chapasi.

KUMBI UFUMU WAKU CHIUTA WAZAMUKWAMBA WULI KULAMULIYA?

Kwamuka kwa fumbu lenili kusazgapu fundu zinayi izi:

1. Mbalongozgi andali cha wo azamulamuliya mu Ufumu wenuwu.

2. Alongozgi andali azamukhumba cha kuti aleki kulamuliya ndipu azamulimbana ndi Ufumu waku Chiuta.—Sumu 2:2-9.

3. Ufumu waku Chiuta wazamunanga alongozgi andali wosi wo azamukhumba kulutirizga kulamuliya ŵanthu. (Danyele 2:44; Chivumbuzi 19:17-21) Yeniyi yazamuja nkhondu yakumaliya pacharu chosi. Ndipu nkhondu iyi yidanika kuti Aramagedoni.—Chivumbuzi 16:14, 16.

4. Wosi wo ŵe kuchigaŵa cha Ufumu waku Chiuta azamutaskika pa nkhondu ya Aramagedoni ndipu azamusere mucharu chifya mo mwazamuja chimangu. Nge mo Bayibolu likambiya, ŵanthu ŵenaŵa ndiwu azamupanga “mzinda ukulu,” ndipu atenere kuti azamuja mamiliyoni nganandi.—Chivumbuzi 7:9, 10, 13, 14.

KUMBI MUNGAYANDUWA WULI NDI UFUMU WAKU CHIUTA?

Munthu yo wakhumba kuzija mu Ufumu waku Chiuta chakwamba watenere kusambira. Venivi ndivu Yesu wangukamba mu pempheru laki kuti: “Azamusaniya umoyu wamuyaya asani aziŵa yimwi Chiuta yija wauneneska, ndi Yesu Khristu yo mukutuma.”—Yohane 17:3.

Ŵanthu ayanduwa munthowa zinandi asani amuziŵa Yehova Chiuta nge Munthu chayiyu. Tiyeni tikambiskanepu waka nthowa ziŵi: Nthowa yakwamba, atamba kuja ndi chivwanu chakukho mwaku iyu. Chivwanu chenichi chitiŵasimikiziya kuti Ufumu waku Chiuta uliku nadi ndipu uyambengi kulamuliya pambula kuswera. (Aheberi 11:1) Nthowa yachiŵi, yiwu atamba kwanja Chiuta kweniso ŵanthu. Kwanja Chiuta kutiŵachitiska kuti amuvwiyengi ndi mtima wosi. Ndipu kwanja ŵanthu kutiŵawovya kuti agwiriskiyengi ntchitu mazu ngo Yesu wangukamba, ngakuti: “Vinthu vosi vo mukhumba kuti ŵanthu akuchitiyeni, namwi muŵachitiyi venivo.”—Luka 6:31.

Nge mo ada achanju achitiya, Mulengi widu watitikhumbiya vinthu vamampha ukongwa. Iyu wakhumba kuti tije ndi “umoyu weneku” nge mo Bayibolu likambiya. (1 Timote 6:19) Kweni mazuŵa nganu, ŵanthu aja ndi “umoyu weneku” cha. Kwa vyaka vinandi, ŵanthu aja umoyu wakusuzga ukongwa ndipuso asuzgika kuti asaniyi vinthu vakukhumbika pa umoyu. Kuti muziŵi mo “umoyu weneku” wazamuŵiya, ŵanaŵaniyani vinthu vamampha vo Ufumu waku Chiuta wazamuchitiya ŵanthu.