Vo Anyaki Agomezga

Ahindu

agomezga kuti munthu wasuzgika chifukwa cha vo wachita sonu pa umoyu waki pamwenga vo wachitanga kali wechendabiliki so. Munthu wangafwatulika kuti waleki kubalika kananandi pijapija asani wasinthiya limu umoyu waki ndipu waŵika mtima waki wosi pa kusopa Chiuta waki pe.

Asilamu

agomezga kuti munthu wasuzgika chifukwa cha ubudi wo wachita pamwenga wangakumana ndi masuzgu kuti walongo kugomezgeka kwaki. Dr. Sayyid Syeed, puresidenti wa chisopa cha Chisilamu ku North America wangukamba kuti: “Masoka ngo ŵanthu akumana nangu ngatiŵakumbusa kuti akhumbika kumuwonga Chiuta chifukwa cha vosi vo asaniya ndipuso kuti akhumbika kovya wo asuzgika.”

Ayuda

agomezga kuti munthu wasuzgika chifukwa cha vakuchita vaki. Ayuda anyaki agomezga kuti kwazamukuŵa chiyuka ndipu pa nyengu yeniyi ŵanthu ambula kunanga wo asuzgikanga azamuyeruzgika mwaurunji. Chisambizu chachiyuda cho chiziŵika so kuti Kabbala chikamba kuti kubalika so kupaska munthu mwaŵi wakuwerezawereza wakuti asani wafwa wajipepesiyengi maubudi ngaki.

Abuda

agomezga kuti munthu wabalika maulendu nganandi. Ndipu pa nyengu yeyosi yo iyu we ndi umoyu wasuzgika. Kweni masuzgu ngaki ngamala asani waleka kuchita pamwenga kuŵanaŵana vinthu viheni ndipuso asani wasintha makhumbiru ngaki ngaheni. Abuda agomezga so kuti zeru, ntchitu zamampha ndipuso kujisambiza vingachitiska munthu kuti wafiki pakuja ndi umoyu wakukondwesa ukongwa wo atiwudana kuti Nirvana.

Akonifyushani

agomezga kuti munthu wasuzgika chifukwa cha vinthu vo “wanangisa pamwenga vo watondeka kuchita.” Venivi ndivu buku linyaki likamba. Likamba so kuti Akonifyushani agomezga kuti “masuzgu nganandi ngo ŵanthu akumana nangu ngachitika ndi vakulengeka vauzimu vanthazi ukongwa kuluska yiwu. Ndipu lilongo kuti masuzgu ngangamala asani ŵanthu angachita ntchitu zamampha. Mwaviyo, munthu wakhumbika ŵaka kuzomereza vo vakulengeka vauzimu venivi vakhumba.”—A Dictionary of Comparative Religion.

Visopa va mafuku

agomezga kuti munthu wasuzgika chifukwa cha kuloweka ndi afwiti. Mwakukoliyana ndi vo agomezga yiwu awona kuti masenga ngangachitiska munthu kuti wasaniyi mwaŵi pamwenga soka. Ndipu awona kuti masuzgu ngo munthu wangakumana nangu chifukwa cha masenga, ngangamalaku chifukwa cha midawuku yakupambanapambana. Asani munthu wasuzgika ndi nthenda yinyaki, yiwu agomezga kuti munkhwala wakutuliya kwa ang’anga ndiwu ungachizga munthu yo waloweka.

Akhristu

agomezga kuti masuzgu ngakwamba chifukwa cha ubudi wa ŵanthu ŵaŵi, nge mo likambiya buku la Chiyambo. Chinanga kuti veviyo, visopa vinandi vikusazgiyapu fundu zinyaki pa chisambizu chenichi. Mwakuyeruzgiyapu, Akatolika anyaki agomezga kuti munthu yo wasuzgika ‘wangakambiya Chiuta’ masuzgu ngaki mu pempheru kuti yije sembi ndipu sembi yeniyi yingayandulisa ukongwa mpingu. Pamwenga Chiuta wangachitiska kuti munthu munyaki wakumani ndi masuzgu kuti munyaki wataskiki.