1. Kumbi Chiuta Ndiyu Wachitiska Kuti Tisuzgikengi?
Ntchifukwa Wuli Tikhumbika Kuziŵa Uneneska?
Ŵanthu anandi akana kusopa Chiuta chifukwa awona kuti iyu ndiyu wachitiska masuzgu.
Ŵanaŵaniyani Ivi
Kukamba uneneska, alongozgi avisopa asambiza kuti ndi Chiuta yo wachitiska taŵanthu kuti tisuzgikengi. Mwakuyeruzgiyapu, alongozgi anyaki akamba kuti:
Masoka ngachilengedu ntchilangu chakutuliya kwaku Chiuta.
Ŵana atufwa chifukwa chakuti Chiuta wakhumba angelu anandi kuchanya.
Chiuta waseleriyapu pa nkhondu zo zichitiska kuti ŵanthu asuzgikengi ukongwa.
Kumbi vo alongozgi avisopa asambiza vakukwaskana ndi Chiuta vauneneska? Wuli asani Chiuta wakondwa nawu cha?
KUTI MUZIŴI VINANDI
Woneriyani vidiyo yakuti, Nchifukwa Wuli Tikhumbika Kusambira Bayibolo? pa jw.org.
Vo Bayibolu likamba
Ndi Chiuta cha yo wachitiska kuti tisuzgikengi.
Asani ndiyu wachitiskanga, ndikuti vatingi vipambanengi ukongwa ndi mijalidu yaki yamampha yo yizumbulika mu Bayibolu. Mwakuyeruzgiyapu:
“Nthowa [zaku Chiuta] zosi zaurunji. . . . Iyu ndi murunji kweniso ngwakunyoloka.”—MARANGU 32:4.
“Chiuta wauneneska wangachita cha vinthu viheni, Wanthazizosi wangananga cha!”—JOBU 34:10.
“Ndipu Wanthazizosi wabendezga urunji cha.”—JOBU 34:12.
Chiuta watinkha visopa vo vikamba vinthu vaboza vakukwaskana ndi iyu.
Venivi visazgapu visopa vo visambiza kuti Chiuta ndiyu wachitiska kuti taŵanthu tisuzgikengi kweniso ŵanthu wo achitaku nkhondu ndi viwawa.
“Achimi akamba mauchimi ngaboza mu zina langu [Chiuta]. Ini ndaŵatuma cha pamwenga kuŵalamula pamwenga kulongoro nawu. Achimi wo, atikukambiyani viwona vaboza, . . . ndipuso maboza nga mumtima mwawu.”—YEREMIYA 14:14.
Yesu wangususka visopa vachinyengu.
“Ndi munthu weyosi cha yo watindidana kuti, ‘Ambuya, Ambuya,’ yo wazamusere mu Ufumu wakuchanya, kweni yija yo wachita khumbu la Ada wo ŵe kuchanya. Pa zuŵa lo, ŵanthu anandi azakundikambiya kuti: ‘Ambuya, Ambuya, asi takambanga vinthu nge achimi mu zina linu, ndipuso tatuzganga viŵanda mu zina linu, kweniso tachitanga vinthu vinandi vakuziziswa mu zina linu?’ Kweni ini ndazakuŵakambiya kuti: ‘Nditikuziŵani cha! Tuwanipu yapa, mwaŵanthu ambula kuvwiya marangu yimwi!’”—MATEYU 7:21-23.