Mulongongi Chanju

Suzgu lo Liŵapu

Maŵanaŵanu nga sankhu ngamala liŵi cha mumtima mwa munthu. Munthu wakhumbika nyengu kweniso kufwiyapu kuti kachidononu ko katambisa nthenda kamali. Mwakuyanana ŵaka, pakhumbika nyengu kweniso kufwiyapu kuti sankhu limali. Kumbi mungachita wuli kuti sankhu limali mumtima mwinu?

Fundu ya mu Bayibolu

Vithuzi: 1. Munthu wa ku Asia wajula chisasa kuti munthu mufipa yo wapinga makapu nga vakumwa wajumphi. 2. Munthu mufipa mwenuyu wagaŵiya vakumwa anyaki wo wagwira nawu ntchitu kusazgapu munthukazi wa ku India yo tamukambapu kali.

“Vwalani chanju, pakuti ndichu chitovya kuti ŵanthu akoliyanengi ukongwa.”—AKOLOSE 3:14.

Kumbi venivi ving’anamuwanji? Asani ŵanthu atiŵachitiya vinthu vamampha anyawu vitovya kuti akoliyanengi. Asani mulongo kuti mutiŵayanja anyinu muŵengevi sankhu. Ndipu asani mutiŵayanja ukongwa, muyambengi kuŵawona mwakwenere.

Vo Mungachita

Vithuzi: 1. Mzungu wakukota watovyeka ndi munthukazi wa ku India kukwera pa masitepusi achituwa kuchigula vinthu. 2. Mzungu wakukota wapaska mabisiketi munthu wa ku Asia yo waja nayu pafupi yo we pa chithuzi chakwamba.

Ŵanaŵaniyani nthowa zo mungalongore kuti mutanja ŵanthu a mu kagulu ko mutikawona mwambula kwenere. Mukhumbika kuchita vinthu vapade pe cha kuti mulongo kuti mutiŵayanja. Yesani kuchita chimoza pamwenga vinandi mwa vinthu ivi:

Tinthu timanatimana to mungachita kulongo kuti mutanja anyinu, tingawovya kuti mumalani ndi sankhu

Muŵalongongi nkharu yamampha ŵanthu a mu kagulu kenaka, nge kuŵajuliya chisasa pamwenga kuŵapaska malu ngo yimwi mwajapu mugalimotu yo mwakwera.
Mungayamba kucheza nawu chinanga kuti yiwu atichiziŵa umampha cha chineneru chinu.
Muzikirengi asani achita vinthu mu nthowa yo muleka kuvwisa.
Muŵalongongi lisungu asani atikukambiyani masuzgu ngawu.

Chakuyeruzgiyapu Cho Chikuchitika Nadi: Nazaré (Guinea-Bissau)

“Nyengu yinyaki ndaŵasankhanga ŵanthu akutuliya ku vyaru vinyaki. Ŵanthu a mu charu chidu akambanga kuti ŵanthu anandi akutuliya mu vyaru vinyaki, akamba boza ndi chilatu chakuti asaniyi vinthu kweniso kuti anandi ŵe ndi mijalidu yawuchigeŵenga. Ivi vachitiskanga kuti ndiŵakhwechengi ŵanthu ŵenaŵa. Kweni ndinguŵanaŵaniyaku cha kuti ndichita sankhu, chifukwa umu ndimu ŵanthu anandi awoniyanga ŵanthu akutuliya mu vyaru vinyaki.

“Pati pajumpha nyengu, ndinguziŵa kuti vo ndachitiyanga ŵanthu ŵenaŵa lenga sankhu. Ulongozgi wa zeru wa mu Bayibolu ungundiwovya kuti ndiŵayanjengi ukongwa. Sonu ndikuleka kuŵakhwecha. Mumalu mwaki, nditiŵatawuzga kweniso kukambiskana nawu. Nditesesa kuti ndimuziŵi umampha munthu weyosi wakutuliya ku charu chinyaki. Sonu nditiŵawona mwakwenere ŵanthu wo atuliya mu vyaru vinyaki ndipu ndifwatuka ukongwa kucheza nawu.”