Vo Vingakuwovyani Kuti Mukhorwengi

Mulimbikiyengi Ntchitu

“Wagwiri ntchitu mwaphamphu, wagwiri ntchitu yamampha ndi manja ngaki kuti wasaniyi chakupaskaku mukavu.”—AEFESO 4:28.

Mlengi widu watitichiska kuti tiwonengi ntchitu mwakwenere. Chifukwa wuli? Munthu yo walimbikiya ntchitu wakondwa chifukwa wasaniya vinthu vakuti vimuwovyengi kweniso viwovyengi banja laki. Wangawovya so munthu munyaki yo wakhumbika chovyu. Yo wakumulemba ntchitu nayu watimuwona kuti ngwakukhumbika. Munthu yo wagwira ntchitu umampha kanandi ntchitu yimala cha. Malemba ngakamba kuti mphotu yakugwira ntchitu mwaphamphu ndi ‘mphasu yakutuliya kwaku Chiuta.’—Wakutawula 3:13.

Muchitengi Vinthu Mwauneneska

“Tigomezga kuti te ndi njuŵi yauneneska, chifukwa tikhumba kuchita vinthu vosi mwauneneska.”—AHEBERI 13:18.

Asani tichita vinthu mwauneneska tija ndi mbiri yamampha, tija ndi chimangu chamumtima kweniso tigona tulu tamampha. Kusazgiyapu yapa, ŵanthu anyaki atithembengi kweniso kutipaska ulemu. Kweni ŵanthu wo aleka kuchita vinthu mwauneneska, aŵavi vinthu venivi. Ndipuso njuŵi yawu yitiŵasuzga ndipu ajaliya ŵaka mantha kuti zuŵa linyaki azamukoleka chifukwa cha uryarya wawu.

Muwonengi Ndalama Mwakwenere

“Umoyu winu uŵi wambula kwanja ndalama, kweni mukhorwengi ndi vo mwe navu pasonu panu.”—AHEBERI 13:5.

Tikhumbika ndalama kuti tiguli chakurya kweniso vinthu vinyaki. Kweni “kwanja ndalama” nkhwakofya ukongwa. Kungachitiska munthu kuti wamaliyi nyengu yaki yinandi kweniso nthazi kuti wasaniyi ndalama zinandi. Chifukwa chakuti wapenjapenja ndalama zinandi, wangaŵavi nyengu yakucheze ndi munthu yo wakutorana nayu kweniso ŵana ndipuso vingakwaska umoyu waki. (1 Timote 6:9, 10) Ndipu chinthu chinyaki chakofya ukongwa ntchakuti, munthu yo watanja ndalama wangayamba kuchita vinthu mwambula kugomezgeka. Munthu munyaki wazeru wangukamba kuti: “Munthu wakugomezgeka walondiyengi vitumbiku vinandi, kweni yo wakhumba kukhupuka mwaliŵi, walutirizgengi cha kuja wambula mulandu.”—Nthanthi 28:20.

Musankhengi Masambiru Ngamampha Ukongwa

“Usungi zeru zakovya ndipuso lusu la kuŵanaŵana.”—NTHANTHI 3:21.

Masambiru ngamampha ngangatiwovya kuja ŵanthu akuthembeka kweniso apapi amampha. Kweni masambiru ngenanga pakungija ngangamuvikiliya cha munthu pamwenga kumuwovya kuti wakondwengi. Kuti vinthu vitiyendiyengi umampha pa umoyu widu, tikhumbika masambiru ngakutuliya kwaku Chiuta. Pakukamba za munthu yo wavwisiya kwaku Chiuta, Malemba ngatiti: “Vosi vo wachita vimuyendiyengi umampha.”—Salimo 1:1-3.