Ntchifukwa Wuli Tisuzgika, Tikota Kweniso Kufwa?

Apapi Ŵidu Akwamba Akuchitiska Kuti Tisuzgikengi

“Ubudi ukuselere mucharu kuziya mwa munthu yumoza, ndi nyifwa chifukwa cha ubudi, nyifwa nayu yikusapaliya ku ŵanthu wosi.”—AROMA 5:12.

Chiuta wangulenga apapi ŵidu akwamba, Adamu ndi Heva ndi maŵanaŵanu kweniso maliŵavu ngambula ubudi. Iyu wanguŵapaska so paradayisu pacharu chapasi kuti ajengemu, ndipu paradayisu uyu wadanikanga kuti munda wa Edeni. Iyu wanguŵakambiya kuti aryengi vipasu va muchimiti chechosi cha mumunda kupatuwaku va muchimiti chimoza. Kweni Adamu ndi Heva angusankha kurya vinyaki mwa vipasu va muchimiti cho Chiuta wanguŵakanizga ndipu wenuwu wenga ubudi. (Genezesi 2:15-17; 3:1-19) Yiwu ŵati aleka kuvwiya, Chiuta wanguŵadikisa mumunda ndipu angwamba kuja umoyu wakusuzgika. Pati pajumpha nyengu, yiwu angubala ŵana ndipu ŵana ŵawu nawu asuzgikanga. Wosi angukota kweniso kufwa. (Genezesi 3:23; 5:5) Nasi titama, tikota kweniso titufwa chifukwa chakuti tikutuliya ku banja lenili lakwamba.

Mizimu Yiheni Yichitiska so Kuti Tisuzgikengi

“Charu chosi che mu nthazi ya muheni yo.”—1 YOHANE 5:19.

“Muheni yo” ndi Satana. Iyu ntchakulengeka chauzimu chambula kuwoneka cho chingugarukiya Chiuta. (Yohane 8:44; Chivumbuzi 12:9) Pavuli paki, vakulengeka vauzimu vinyaki navu vingukoliyana ndi Satana. Yivu vidanika kuti angelu aheni. Mizimu yiheni yeniyi yigwiriskiya ntchitu nthazi zawu pakulandizga ŵanthu kweniso kuŵapatuska kwa Mlengi. Mizimu yiheni yichitiska kuti ŵanthu anandi achitengi vinthu viheni. (Salimo 106:35-38; 1 Timote 4:1) Satana kweniso angelu aheni akondwa kuti ŵanthu asuzgikengi.

Nyengu Zinyaki Tichitiska Tija Masuzgu

“Chechosi cho munthu wamija, ndichu so wazamuvuna.”—AGALATIYA 6:7.

Tisuzgika so mu nthowa zakupambanapambana chifukwa tosi tikuhara ubudi kweniso Satana wachitiska masuzgu pacharu. Kweni nyengu zinyaki ŵanthu achitiska ŵija masuzgu. Kumbi achita wuli venivi? Asani achita vinthu viheni pamwenga asankha vinthu mwambula zeru, kanandi avuna vinthu viheni. Kweni asani ŵanthu achita vinthu vamampha, avuna vinthu vamampha. Mwakuyeruzgiyapu, munthulumi yo wakuto kweniso ada wo achita vinthu mwauneneska, agwira ntchitu mwaphamphu ndipuso atanja banja lawu, avuna vinthu vamampha ndipu atovya kuti banja lawu likondwengi. Kweni munthu yo watchova juga, watumwa ukongwa moŵa pamwenga ndi mulesi, iyu ndi banja laki atuŵa akavu. Mwaviyo, tingachita umampha kuvwiya ulongozgi wakutuliya ku Mlengi widu. Iyu wakhumba kuti tivunengi vinthu vinandi vamampha, kusazgapu “chimangu chikulu.”—Salimo 119:165.

Tija mu “Mazuŵa Ngakumaliya”

“Mu mazuŵa ngakumaliya . . . , ŵanthu azamuja akujiyanja, akwanja ndalama, . . . ambula kuvwiya apapi, . . . ambula kujiko, akofya, akutinkha vamampha.”—2 TIMOTE 3:1-5.

Mazuŵa nganu, ŵanthu anandi alongo mijalidu yo yazumbulika pa lemba ili. Mijalidu yo alongo mbukaboni unyaki wakuti tija mu “mazuŵa ngakumaliya” nga charu ichi. Malemba ngakukambiya so limu kuti tazamuziŵa kuti tija mu mazuŵa ngakumaliya asani tiwona nkhondu, nja, vidilirisi vikuluvikulu kweniso matenda. (Mateyu 24:3, 7, 8; Luka 21:10, 11) Vinthu venivi vichitiska masuzgu ngakulu kweniso nyifwa.