Kumbi Vipangizu Va Mazuŵa Nganu Vikwaska Wuli Nthengwa Yinu?
Kugwiriskiya ntchitu umampha vipangizu va mazuŵa nganu, kungawovya kuti ŵanthu akutorana ayanjanengi ukongwa. Mwakuyeruzgiyapu, vingawovya kuti yiwu akambiskanengi nyengu zosi.
Kweni ŵanthu anyaki akutorana ativigwiriskiya ntchitu umampha cha vipangizu venivi, mwakuti . . .
vitiŵamaliya nyengu yakucheze limoza.
agwiriya ntchitu kunyumba pa nyengu yambula kwenere.
athembana cha ndipuso aleka kugomezgeka.
VO MUTENERE KUZIŴA
NYENGU YAKUCHEZE LIMOZA
Michael wangukamba kuti: “Nyengu zinyaki asani ini ndi muwolu wangu ticheza, iyu watuŵa kuti we ‘kunyaki.’ Iyu wajaliya ŵaka kulereska pafoni yaki ndipu wakamba kuti, ‘Mpaka sonu ndendamalizi vo ndichita pafoni.’” Jonathan wangukamba kuti pa nyengu yeniyi “ŵanthu akutorana angaŵa kuti ŵe limoza kweni weyosi maŵanaŵanu ngatuŵa kuti nge kunyaki.”
ŴANAŴANIYANI FUNDU IYI: Kumbi nkhalinga po foni pamwenga mameseji vitimbanyizga nyengu yo mwakhumbikanga kucheza ndi yo mukutorana nayu?—AEFESO 5:33.
NTCHITU
Ŵanthu anyaki akhumbika kumuka foni pamwenga maimelu nyengu zosi chifukwa cha ntchitu yo agwira. Chinanga kuti anyaki ntchitu yawu yingaŵa viyo cha, kweni vitiŵasuzga mbwenu kuŵeruka chinanga kuti nyengu yawu yakwana. Munthulumi munyaki zina laki Lee wanguti: “Vituŵa vakusuzga kuleka kumuka foni pamwenga meseji ya ntchitu pa nyengu yo ndikhumbika kucheza ndi muwolu wangu.” Munthukazi munyaki zina laki Joy wanguti: “Ndigwiriya ntchitu kunyumba, mwaviyo vakusuzga kuziŵa nyengu yakuŵerukiya. Pakhumbika phamphu kuti ndilekengi kuchita vinthu mwakujumphisa.”
ŴANAŴANIYANI FUNDU IYI: Kumbi muvwisiya ndi mtima wosi asani mulumu pamwenga muwolu winu walongoro namwi?—LUKA 8:18.
KUGOMEZGEKA
Kafukufuku munyaki wangulongo kuti kugwiriskiya ntchitu uheni malu ngakucheziyapu nga pa Intaneti, kuchitiska kuti ŵanthu akutorana ayambanengi. Ŵanthu 10 pa ŵanthu 100 wo angufumbika, anguzomereza kuti aŵika vinthu pa malu ngakucheziyapu nga pa Intaneti mwakubisa kwambula munthu yo akutorana nayu kuziŵa.
Ŵanthu anandi akamba kuti malu ngakucheziyapu nga pa Intaneti ngangaŵa ngakofya ku ŵanthu akutorana ndipu chingaŵa chipusu kwamba jalidu la ureŵi. Mphakuvwika kuti maloya ngakamba kuti malu yanga ngachitiska kuti nthengwa zinandi zimalengi.
ŴANAŴANIYANI FUNDU IYI: Kumbi mutimubisa munthu yo mukutorana nayu vo mukambiskana ndi munthu yo ndi munthulumi pamwenga munthukazi munyinu cha?—NTHANTHI 4:23.
VO MUNGACHITA
MUŴIKENGI PAKWAMBA VINTHU VAKUKHUMBIKA
Munthu yo watanja cha kurya wangaja ndi liŵavu lamampha cha. Mwakuyanana waka, munthu yo watanja cha kucheze limoza ndi munthu yo wakutorana nayu, wachitiska masuzgu mu nthengwa yawu.—Aefeso 5:28, 29.
FUNDU YA MU BAYIBOLU: “Musimikizi kuti vinthu vakukhumbika ukongwa ndi nivi.”—AFILIPI 1:10.
Kambiskanani masachizgu ngo mungayanja kungagwiriskiya ntchitu ngo nge mumphata pamwenga lembani fundu zinu zo zingawovya kuti vipangizu va mazuŵa nganu vileki kutimbanyizga nthengwa yinu.
Tiyesesengi kuryiya limoza chakurya chinanga kangaŵa kamoza pa zuŵa.
Tijengi ndi nyengu yakulekeze kugwiriskiya ntchitu vipangizu vidu
Tinozgi nyengu yakuchitiya limoza vinthu vinyaki vakukondwesa
Tizimwengi vipangizu vidu ndi usiku ndipu tiviŵikengi patali ndi po tigona
Tipatuwengi maminiti 15 zuŵa lelosi ngakukambiskiyana kwambula kutimbanyizgika ndi vipangizu
Tilekengi kugwiriskiya ntchitu Intaneti nyengu yinyaki