Kumbi Vipangizu Va Mazuŵa Nganu Vikwaska Wuli Maŵanaŵanu Nginu?

Ŵanthu akhumbika kusambira vakukwaskana ndi sukulu, ntchitu pamwenga vinthu vinyaki. Vipangizu va mazuŵa nganu vingawovya kusambira vinthu vakupambanapambana. Mazuŵa nganu, ntchipusu munthu kusambira vinthu vinandi we kunyumba kwaki pamwenga we phee pa mpandu waki.

Kweni anandi wo agwiriskiya ntchitu ukongwa vipangizu va mazuŵa nganu, asaniya kuti . . .

asuzgika kuŵika maŵanaŵanu pa vinthu vo aŵerenga.
asuzgika kuŵika maŵanaŵanu pa chinthu chimoza.
aswera cha kuboweka asani ŵe ŵija.

VO MUTENERE KUZIŴA

Msungwana wachita vinthu vinandi pa nyengu yimoza. Walemba meseji pafoni, wacheza ndi munyaki pa vidiyo kweniso wagwiriskiya ntchitu kompyuta ndipuso buku pakusambira.

KUŴERENGA

Ŵanthu anyaki wo agwiriskiya ntchitu vipangizu va mazuŵa nganu, aŵerenga waka mwamugwazu mumalu mwakuŵerenga nkhani yosi.

Kuŵerenga mwamugwazu nkhwamampha asani mukhumba kusaniya kwamuka kwaliŵi. Kweni kuchita viyo nkhwamampha cha asani mukhumba kuyivwisa umampha nkhani yosi.

ŴANAŴANIYANI FUNDU IYI: Kumbi muchita wuli kuti mufiskengi kuŵerenga nkhani yitali? Kumbi kuchita viyo kungakuwovyani wuli kuti musazgiyeku lusu linu la kuvwisa vo musambira?—NTHANTHI 18:15.

KUŴIKIYAPU MAŴANAŴANU

Anyaki awona kuti vipangizu va mazuŵa nganu vitiŵawovya kuchita vinthu viŵi pa nyengu yimoza, nge kutumiziya anyawu meseji uku aŵerenga. Kweni yiwu atimbanyizgika ndipu angaŵika cha maŵanaŵanu pa vinthu vosi viŵi.

Kuŵika maŵanaŵanu pa vo tichita kukhumbika kujiko, kweni pakhumbika phamphu. Grace wanguti: “Unangisa vinthu vimanavi kweniso usuzgika ukongwa maŵanaŵanu cha. Ndasambira kuti mbumampha kuŵika maŵanaŵanu pa chinthu chimoza pa nyengu yimoza ndipuso kukhwecha kuchita vinandi pa nyengu yimoza.”

ŴANAŴANIYANI FUNDU IYI: Kumbi kuchita vinthu vinandi pa nyengu yimoza kutikutimbanyizgani kuŵika maŵanaŵanu pa vo muchita kweniso kukumbuka vo musambira?—NTHANTHI 17:24.

ASANI MWE MWIJA

Ŵanthu anyaki akhumba cha kuja ŵija, mwaviyo agwiriskiya ntchitu vipangizu va mazuŵa nganu kuti viŵamalisengi phukwa. Ma munyaki zina laki Olivia wanguti: “Ndiboweka kuja waka kwa maminiti 15 asani ndaleka kuwona pafoni yangu pamwenga tabuleti pamwenga kujula TV.”

Kweni kuja kwakuwija nkhwakukhumbika ukongwa asani usambira, chifukwa kutovya kuti munthu waŵanaŵaniyepu vo wasambira.

ŴANAŴANIYANI FUNDU IYI: Asani mwe kwakumwija, kumbi mugwiriskiya ntchitu nyengu yeniyi kuti mulungurukengi?—1 TIMOTE 4:15.

VO MUNGACHITA

SANDANI MO MUGWIRISKIYA NTCHITU VIPANGIZU VA MAZUŴA NGANU

Kumbi mungagwiriskiya wuli ntchitu vipangizu va mazuŵa nganu kuti musazgiyeku lusu linu lakuŵanaŵana? Kumbi vipangizu venivi vingakutimbanyizgani wuli kuŵika maŵanaŵanu pa vo muchita kweniso vo musambira?

FUNDU YA MU BAYIBOLU: “Usungi zeru zakovya ndipuso lusu la kuŵanaŵana.”—NTHANTHI 3:21.

JIFUMBENI KUTI . . .

Kumbi ndisuzgika kuŵika maŵanaŵanu pa nkhani yitali yo ndiŵerenga pa chipangizu changu? Asani ndi viyo, kumbi ndi vinthu wuli vo kanandi vitinditimbanyizga?
Kumbi ndingachita wuli kuti vinganditimbanyizganga ukongwa cha pamwenga kuti vileke limu kunditimbanyizga?

Fundu Yakovya: Yambani kuŵerenga ndimi yimoza ndipu kamana ndi kamana musazgiyengeku zinyaki. Muŵerengengi mwakutuzga mazu kuti muŵikengi maŵanaŵanu pa vo muŵerenga.

Kumbi ndikhumbika kusinthanji kuti ndiŵengi ndi nyengu yakukwana ya kulunguruka vo ndaŵerenga?

Fundu Yakovya: Maminiti 10 ngakumaliya, muweriyengemu vo mwasambira.

Kumbi mphanyengu niyi po ndichita vinthu vinandi pa nyengu yimoza?
Kumbi ndikhumbika kusinthanji kuti ndiŵikengi maŵanaŵanu pa chinthu chimoza pa nyengu yimoza?

Fundu Yakovya: Musambiriyengi pa malu ngo palivi vinthu vakukutimbanyizgani kuti muŵikengi maŵanaŵanu pa vo muŵerenga.

FUNDU YA MU BAYIBOLU: “Saniya zeru, saniya so kuvwisa vinthu.”—NTHANTHI 4:5.