Ntchifukwa Wuli Kuziŵa Kuti kwe Mlengi Nkhwakukhumbika?

Ntchifukwa wuli kuziŵa kuti kwe Mlengi nkhwakukhumbika? Asani musimikiza kuti Chiuta wanthazizosi waliku, mbwenu mungafufuza ukaboni wakuti Bayibolu likulembeka ndi iyu. Ndipu asani mugomezga vo Bayibolu likamba, mungayanduwa mu nthowa izi.

Mukondwengi ukongwa ndi umoyu

VO BAYIBOLU LIKAMBA: “[Chiuta] wachita vinthu vamampha, watikupaskani vuwa kutuliya kuchanya ndipuso nyengu za vipasu, watikupaskani so vakurya vinandi kweniso wazaza mitima yinu ndi likondwa.”—Machitidu 14:17.

VO LING’ANAMUWA: Vinthu vosi vo mukondwa navu pacharu chapasi ndi mphasu yakutuliya ku Mlengi. Mungawonga ukongwa mphasu zenizi asani mungaziŵa mo Chiuta watikuphweriyani.

Musaniyengi ulongozgi wamampha wo ungakuwovyani sonu

VO BAYIBOLU LIKAMBA: “Uvwisengi cho ntchaurunji, chakunyoloka ndipuso chakwenere, uvwisengi nthowa yosi ya cho ntchamampha.”—Nthanthi 2:9.

VO LING’ANAMUWA: Nge Mlengi winu, Chiuta waziŵa vo mukhumbika kuti mukondwengi. Asani musambira Bayibolu, mungasambira vinandi vo vingakuwovyani pa umoyu winu.

Musaniyengi kwamuka kwa mafumbu nginu

VO BAYIBOLU LIKAMBA: “Umuziŵengi Chiuta.”—Nthanthi 2:5.

VO LING’ANAMUWA: Kuziŵa kuti kwe Mlengi, kungakuwovyani kuziŵa kwamuka kwa mafumbu ngakukhumbika ukongwa, nge ngakuti: Ntchifukwa wuli te ndi umoyu? Ntchifukwa wuli pacharu pe masuzgu nganandi viyo? Ntchinthu wuli chichitika asani munthu wafwa? Mungasaniya kwamuka kwakukhorwesa kwa mafumbu ngenanga mu Bayibolu.

Mujengi ndi chilindizga cha munthazi

VO BAYIBOLU LIKAMBA: “‘Ndiziŵa umampha vo nditikuŵanaŵaniyani,’ Yehova ndiyu wakamba, ‘ndiŵanaŵana kuti ndikupaskeni chimangu, soka cha, kuti vinthu vizikuyendiyeni umampha kunthazi kweniso kuti muje ndi chilindizga chamampha.’”—Yeremiya 29:11.

VO LING’ANAMUWA: Chiuta walayizga kuti kunthazi wazamutuzgapu vinthu viheni, masuzgu ndipuso chinanga ndi nyifwa. Asani mugomezga malayizgu ngaku Chiuta, vinthu vamampha vo mulindizga vikuwovyeningi kukunthiyapu masuzgu ngo mukumana nangu.

Mo anyaki ayanduliya chifukwa chakugomezga kuti kwe mlengi

“Nyengu zosi ndizizwa ukongwa asani ndiwona mo Chiuta watitiwovye pa vinthu vinandi pa umoyu widu. Iyu watitiwovya kuziŵa chinthu cho ntchakukhumbika ukongwa pa umoyu, mo tingamalisiya mphindanu ndi anyidu kweniso mo tingajaliya bwezi laku Chiuta.”—Cyndi, U.S.A.

“Kugomezga kuti kwe Mlengi, kutindiwovya kuti ndikondwengi kweniso kukhorwa ndi umoyu. Kutindiwovya so kuti vinthu vindiyendiyengi umampha, chifukwa pe vinthu vinandi vo ndingasambira vakukwaskana ndi iyu, vo wakulenga kweniso Mazu ngaki.”—Elise, France.

“Kugwiriskiya ntchitu vo Mlengi widu watitisambiza mu Bayibolu, kutindiwovya kuti ndikondwengi ukongwa. Kutindiwovya kuti ndikhorwengi, ndilekengi kukayikiya vo anyangu kamba ndi kuchita, ndiŵachitiyengi lisungu kweniso kuziŵa vo ŵanthu anyaki akhumbika. Kwandiwovya so kuti ndije da wamampha.”—Peter, Netherlands.

“Ndechendasambiri vakukwaskana ndi Chiuta ndenga munkharyi, ndagonangagonanga, ndipuso ndasweranga kuluta ku ntchitu. Ndakondwanga cha ndi umoyu! Sonu ndiwona kuti umoyu ndi mphasu yamampha ukongwa yo tikhumbika kukondwa nayu kweniso kuyiwona kuti njakuzirwa.”—Liz, Estonia.

“Ndifipa mtima ndi vinthu vinandi ukongwa. Kweni kuziŵa kuti vinthu viheni, vinthu vambula urunji kweniso masuzgu vazamumala, kutindiwovya kuti ndikunthiyengepu.”—Adrien, France.