Rahabi Wabisa Azondi

ŴANTHU anthurumi yaŵa ŵe m’masuzgu. Atenele kuthaŵa kuti angabayika. Yiwu mbazondi a Chiyisraele, ndipu munthukazi yo watiŵawovya ndi Rahabi. Nyumba yaki ye m’mphepete mwa mpanda wa msumba wa Yeriko. Tiyi tiwoni chifukwa cho ŵanthu yaŵa asuzgikiya viyo.

Ayisraeli ŵenga pafupi kuyambuka Msinji wa Yordane kuti asere m’charu cha Kanani. Kweni ŵechendayambuki, Yoswa wangutuma azondi ŵaŵi. Iyu wanguŵakambiya kuti: ‘Lutani mukawoni charu cha Kanani ndi msumba waki wa Yeriko.’

Azondi yaŵa ŵati ŵafika mumsumba wa Yeriko, anguchifikiya m’nyumba yaku Rahabi. Kweni munthu munyaki wanguchikambiya fumu ya m’msumba wa Yeriko kuti: ‘Ŵanthu ŵaŵi ŵa Chiyisraele asere mumsumba wunu ndi usiku kuti azizondi charu chidu.’ Fumu yati yavwa ivi, yingutuma ŵanthu kuti aluti kunyumba kwaku Rahabi, ndipu yiwu angumulamula kuti: ‘Atuzgi anthurumi wo ŵaza m’nyumba yaku!’ Kweni Rahabi wanguŵabisa azondi yaŵa kuchanya kwa nyumba yaki. Sonu iyu wangukamba kuti: ‘Ŵanthu wo anguza nadi kweni ndiziŵa cha ko anguturiya. Ndipu yiwu asoka panu kwati kwayamba waka kufipa ndipuso chipata cha msumba ŵechendajari. Asani mungaŵatchimbiriya muŵasaniyengi.’ Ndipu ŵanthu wo anguŵalondo azondi ŵa.

Ŵati aluta, Rahabi wangukwera kuchanya kwa nyumba yaki mwaliŵiliŵi ndipu wangukambiya azondi kuti: ‘Ndiziŵa kuti Yehova wakupaskeningi charu ichi. Tikuvwa mo Chiuta wangupatuskiya maji nga mu Nyanja Yiyera mwati mwatuwa ku Egipiti ndipuso mo mungubayiya fumu Sihoni ndi Ogi. Ini ndakuchitiyani lisungu, sonu ndilayizgeni kuti namwiso mwazakundichitiya lisungu. Muŵapozomoski ada, ama ndi abali ŵangu wosi.’

Ndipu azondi angumulayizga kuti azakumuchitiya lisungu. Kweni angukambiya Rahabi kuti wachiti chinthu chinyaki. Azondi wo anguti: ‘Uto chingwi chiyera ichi ndipu uchimangiriyi pa windu la nyumba yaku ndipu uwunganiski abali ŵaku wosi ndi kuŵaserezga m’nyumba yaku. Panyengu yo tosi tazamukuza kuzironda charu cha Yeriko, tazamuŵona chingwi ichi pa windu la nyumba yaku ndipu tazamubaya munthu weyosi cha m’nyumba yaku.’ Sonu azondi ŵati ŵawere kwaku Yoswa, angumukambiya vosi vo vinguchitika.