Solomoni Wazenga Nyumba Yakusopiyamu

DAVIDI wechendafwi, wangupaska Solomoni pulanu yakutuliya kwaku Chiuta ya mo wangazenge nyumba yakusopiyamu yaku Yehova. Solomoni wangwamba kuzenga nyumba yakusopiyamu, m’chaka chachinayi cha ufumu waki. Ndipu wanguyizenga kwa vyaka 7 ndi myezi 6. Ŵanthu wo azenganga nyumba yakusopiyamu angujumpha 180,000 ndipu angunanga ndalama zinandi ukongwa. Ichi chenga chifukwa chakuti, angugwiriskiya nchitu golidi ndi siliva munandi pakuzenga nyumba iyi.

Nyumba yakusopiyamu yenga ndi vipinda viŵi vikuluvikulu nge mo chenge chihema. Kweni vipinda ivi venga vikulu ukongwa mwakuti vipinda va muchihema vaserengamu kaŵi. Solomoni wanguŵika bokosi la phanganu m’chipinda chamukati mwa nyumba yakusopiyamu ndipu vinthu vinyaki vosi vo vasungikanga muchihema, wanguviŵika m’chipinda chinyaki.

Ŵati amala kuzenga nyumba yakusopiyamu anguchita phwandu likulu. Solomoni wangujikama panthazi pa nyumba yakusopiyamu ndipu wanguromba nge mo uwone pachithuthuzi po. Solomoni wangukambiya Yehova kuti: ‘Chinanga nkhuchanya mukwanaku cha, kwe wuli nyumba yakusopiyamu yo ndazenga. Chondi Chiuta wangu, vwiyani ŵanthu ŵinu achiromba po alazga masu ku malu yanga.’

Solomoni wati wamaliza kuromba, motu ungusika kutuwa kuchanya ndipu unguwotcha sembi zanyama zo angunozga. Ndipu m’nyumba yakusopiyamu mwenga ukweru wakuŵala ukongwa wakutuliya kwaku Yehova. Ivi vingulongo kuti Yehova wanguvwa ndipuso wangukondwa ndi nyumba yakusopiyamu kweniso rombu laku Solomoni. Sonu ŵanthu anguleka kuchisopa ku chihema ndipu angwamba kuluta ku nyumba yakusopiyamu.

Solomoni wanguwusa mwazeru kwa nyengu yitali ndipu ŵanthu ŵenga akukondwa. Kweni Solomoni wanguto anthukazi anandi a muvyaru vinyaki wo alekanga kusopa Yehova. Kumbi wamuwona munthukazi yumoza yo wasopa ngoza? Pakumaliya paki, anthukazi yaŵa anguchitiska kuti Solomoni nayu wasopengi angoza. Kumbi uziŵa vo vinguchitika Solomoni wati wayamba kusopa angoza? Iyu wanguleka kuŵachitiya lisungu ŵanthu. Wenga wankhaza ndipu ŵanthu akondwanga cha.

Ivi vingumukwiyiska ukongwa Yehova ndipu wangukambiya Solomoni kuti: ‘Ndikulondengi ufumu uwu ndipu ndipaskengi munthu munyaki. Ndichitengi ivi iwi weche wamoyu cha kweni m’nyengu ya ufumu wa mwana waku. Kweni mwana waku ndimulondengi ŵanthu wosi cha.’ Tiyi tiwoni mo ivi vinguchitikiya.