Yohane Wabatiza Yesu

AWONA nkhunda yo yikhumba kubota pamutu pa munthu yo. Iyu ndi Yesu. Panyengu iyi ndipu we ndi vyaka pafupifupi 30. Ndipu munthu yo we nayu ndi Yohane. Tikusambirapu kali chinthu chinyaki chakukwaskana ndi munthu mwenuyu. Kumbi ukumbuka kuti panyengu yo Mariya wangulutiya kuchiwona mubali waki Elizabeti, mwana yo wenga m’moyu mwaku Elizabeti wanguzantha ndi likondwa? Mwana mweniyo wenga Yohane. Kumbi sonu Yohane ndi Yesu achitanji yapa?

Yapa ndipu Yohane wamubizga waka Yesu m’maji nga mu Msinji wa Yordane. Asani munthu wabatizika, chakwamba wabizika m’maji ndipu pavuli paki wazuwulika. Chifukwa chakuti ivi ndivu Yohane wachitiyanga ŵanthu, iyu wadanikanga kuti Yohane Mubatizi. Kweni nchifukwa wuli Yohane wabatiza Yesu?

Yohane wangubatiza Yesu chifukwa chakuti iyu wangwesa kumupempha Yohane kuti wamubatizi. Yohane wabatizanga ŵanthu wo alapanga chifukwa cha vinthu viheni vo achitanga. Kweni kumbi Yesu wanguchita chinthu chiheni chechosi kuti walapi? Awa, Yesu wanguchitapu chiheni chechosi cha, chifukwa iyu wenga Mwana waku Chiuta yo wangutuliya kuchanya. Kweni penga chifukwa chinyaki cho wangupemphe Yohane kuti wamubatizi. Tiyi tiwoni kuti chenga chifukwa wuli.

Yesu wechendazi kwaku Yohane, wenga wakupala mathabwa. Munthu wakupala mathabwa ndi mweniyo wakhoma vinthu nge mathebulu, mipandu ndi vipuna. Yosefe murumu waku Mariya, wenga wakupala mathabwa ndipu ndiyu wangusambiza Yesu. Kweni Yehova wangutuma Mwana waki pacharu chapasi kuti wazigwirengi nchitu yakupala mathabwa cha. Iyu wenga ndi nchitu yapade yakuti wachiti ndipu nyengu yingukwana yakuti Yesu wachiti nchitu iyi. Yesu wangupempha Yohane kuti wamubatizi kulongo kuti sonu iyu wakhumbanga kuchita khumbu la Awiski. Kumbi ivi vingumukondweska Chiuta?

Hinya, vingumukondweska, chifukwa Yesu wati wazuwuka m’maji, mazu ngangutuwa kuchanya ndi kukamba kuti: ‘Uyu ndiyu Mwana wangu wakwanjiwa yo ndikondwa nayu.’ Ndipuso viwoneka kuti machanya ngangujulika ndipu nkhunda yinguza pamutu paku Yesu. Kweni chinanga wuli yawonekanga ngati nkhunda, yenga nkhunda chayiyu cha. Uwu wenga mzimu utuŵa waku Chiuta.

Sonu Yesu wenga ndi vinthu vinandi vakuti waŵanaŵani, ndipu wanguluta kuchija kwakuyija kwa mazuŵa 40. Sonu Satana wanguluta kweniko. Iyu wangumuyesa Yesu katatu kuti wachiti vinthu vakususkana ndi malangu ngaku Chiuta. Kweni Yesu wangumukaniya.

Ivi vati vakapu, Yesu wanguweku ndipu wangukumana ndi ŵanthu anyaki ŵeniwo anguja akusambira ŵaki akwamba. Ndipu mazina ngawu ngenga Andreya, Petro (yo wadanikanga so kuti Simoni), Filipu ndi Natanele (yo wadanikanga so kuti Bartolomeya). Yesu ndi akusambira ŵaki yaŵa, anguluta ku Galile. Ŵati afika ku Galile, anguma kwawu kwaku Natanele, ku Kana. Sonu ŵe kweniko Yesu wanguluta ku phwandu likulu la zowala ndipu wanguchita chakuziziswa chakwamba. Kumbi wachiziŵa cho wanguchita? Iyu wangusambuska maji kuja vinyu.