Chigaŵa 4
Chiuta Watitikambiya Vilatu Vaki
1, 2. Kumbi tiziŵa wuli kuti Chiuta wamuka mafumbu nga ŵanthu wo afumba mwakutuliya pasi pa mtima?
CHIUTA wachanju wavumbuwa vilatu vaki ku ŵanthu wo atimupenja ndi mtima wosi. Iyu wamuka mafumbu ngo ŵanthu afumba ngakuti nchifukwa wuli Chiuta wazomereza kuti ŵanthu asuzgikengi.
2 Bayibolo likamba kuti: “Asani utimupenja [Chiuta] umusaniyengi.” “Kweni waliku Chiuta kuchanya yo wavumbuwa vamuchibisibisi.” “Ambuya [Yehova] Chiuta kuti wachita kanthu cha kakuwubendi, kwambura kuti wadankha wakavumbuliya ku ŵateŵeti ŵaki ŵamchimi.”—1 Mikoka 28:9; Danyele 2:28; Amosi 3:7.
Kumbi ndi Buku Nili lo Limuka Mafumbu Yanga?
3. Kumbi ndi nunkhu ko tingasaniya chifukwa cho Chiuta wazomereze kuti tisuzgikengi?
3 Mafumbu ngakuti nchifukwa wuli Chiuta wazomereza kuti tisuzgikengi ndipuso wazamuchita wuli ndi masuzgu, ngamukika mu nkhani zo iyu wakukamba kuti zilembeki ndi chilatu chakuti zitiwovyi. Nkhani izi ndi Mazu ngaki, Bayibolo Lakupatulika. “Lembu losi lakuuzirika ndi Chiuta ndakwanduliya so ku chisambizgu, ku chipanikizga, ku chinyoroska, ku chilangwa chamu urunji: alinga kuti munthu waku Chiuta waŵi wakufiskika, wakuphatiskikiya limu ku nchitu yosi yamampha.”—2 Timote 3:16, 17.
4, 5. Nchifukwa wuli Bayibolo ndi buku lapade?
4 Bayibolo ndi buku lapade. Le ndi nkhani zauneneska zakukwaskana ndi mbiri ya ŵanthu ndipuso likamba nkhani za kali ukongwa ŵanthu ŵechendalengeki. Nkhani zaki zigwira so nchitu ukongwa mazuŵa nganu, chifukwa mauchimi ngaki ngakwaskana ukongwa ndi vakuchitika va nyengu yidu yinu ndipuso vo vichitikengi pambula kuswera yapa.
5 Palivi so buku linyaki lo lingakonkhoska mbiri mwauneneska viyo. Mwakuyeruzgiyapu, ndi mabuku ngamanavi waka ngo ngakulembeka pamanja ndi ŵanthu akali ngo ngeche kusanirika mazuŵa nganu. Kweni pe vigaŵa pamwenga mabuku ngamphumphu nganandi ngakulembeka pamanja nga Bayibolo: mabuku pafufupi 6,000 nga Malemba nga Chihebere (mabuku 39 nga “Phanganu Lakali”) ndipuso pe mabuku pafufupi 13,000 nga Malemba nga Chigiriki nga Chikhristu (mabuku 27 nga “Phanganu Lale”).
6. Kumbi nchifukwa wuli tingasimikizga kuti Bayibolo lo te nalu sonu liyanana ukongwa ndi mazu ngo Chiuta wakambanga pa nyengu yo lalembekiyanga?
6 Chiuta Wanthazizosi yo wakukamba mazu ngo ngakulembeka m’Bayibolo wawonesesa kuti mazu ngo ngenga mu mabuku ngakali yanga ngangasinthikanga cha. Mwaviyo, Mabayibolo ngidu mazuŵa nganu ngayanana waka ndi mabuku ngo ngangulembeka pakwamba. Chinthu chinyaki cho chititiwovya kuziŵa uneneska wa nkhani iyi nchakuti, vyaka 100 vingujumpha cha kutuliya po mabuku ngakwamba ngangulembeke kufika po mabuku nganyaki nga Malemba nga Chigiriki ngachikhristu ngangulembeke. Kweni pa mabuku ngakucharu nga ŵanthu akali, ngo ngeche waka mpaka sonu, palivi lo likulembeka mukati mwa vyaka vimanavi viyo kutuliya po ngangulembeke ngakwamba.
Chawanangwa Chakutuwa Kwaku Chiuta
7. Kumbi Bayibolo lapharazgika wuli pacharu chosi chapasi?
7 Bayibolo ndi buku lo lapharazgika ukongwa pa mabuku ngosi. Mabayibolo ngakukwana 3 biliyoni ngasindikizika. Palivi buku lo lasindikizika viyo. Ndipu Bayibolo pamwenga vigaŵa vaki vafwatulikiya mu vineneru vakujumpha 2,250. Mwaviyo, viwoneka kuti ŵanthu 98 pa ŵanthu 100 ŵewosi pacharu chapasi ŵe ndi Bayibolo.
8-10. Kumbi ndi vifukwa vinyaki nivi vo tikhumbikiya kusambira Bayibolo?
8 Mbuneneska nadi kuti buku lo likutuwa kwaku Chiuta ndipuso lo le ndi maukaboni ngosi ngakulongo kuti ndauneneska likhumbika kuti tilisambiri mwakufikapu.a Likonkhoska vo vakuchitika vacharu ichi ving’anamuwa, chilatu cha umoyu ndipuso vo vichitikengi munthazi. Palivi buku linyaki lo lingakonkhoska vinthu ivi.
9 Chiuta wakambiskana ndi mtundu wa ŵanthu kuziya mu Bayibolo. Mwakugwiriskiya nchitu nthazi yaki pamwenga kuti mzimu, iyu wanguchitisa kuti ŵanthu akukwana 40 alembi Bayibolo. Mwaviyo, Chiuta wakamba nasi kuziya mu Mazu ngaki Ngakupatulika, Bayibolo. Wakutumika Paulo wangulemba kuti: “Pakuronde kwaku ifwi mazu nga uthenga waku Chiuta, mungungaronde nge ndi mazu nga ŵanthu cha, kweni, mo ngaliri, nge ndi mazu ngaku Chiuta.”—1 Ŵatesalonika 2:13.
10 Pulezidenti wanambala 16 wa ku United States, Abraham Lincoln wangukamba kuti, Bayibolo “nchawanangwa chamampha ukongwa cho Chiuta wakupaska ŵanthu . . . Kukaŵengevi Bayibolo mphanyi tiziŵa cha kuti chiheni ndi nichi chamampha ndi nichi.” Sonu kumbi chawanangwa chamampha ukongwa ichi chititikambiyanji vakukwaskana ndi mo masuzgu ngakwambiya, chifukwa cho Chiuta wangazomereze kuchitika ndipuso mo wazamuchitiya ndi masuzgu ngo tikumana nangu?
[Mazu nga m’mphata]
a Kuti muziŵi vinandi vakukwaskana ndi uneneska wa Bayibolo, wonani buku lakuti, Baibulo—Kodi Ndilo Mawu a Mulungu Kapena a Munthu?, lakupharazgika ndi Watchtower Bible and Tract Society of New York, Inc. mu 1989.
[Chithuzi papeji 10]
Bayibolo, Mazu ngaku Chiuta, ndiyu nthowa yo iyu wakambiya ndi mtundu wa ŵanthu