Sambiru 2

Kumbi Chiuta Ndi Yani?

Kumbi Chiuta wauneneska ndi yani, ndipu zina laki ndi yani? (1, 2)

Kumbi wendi liŵavu wuli? (3)

Kumbi mijalidu yaki yikulu ndi niyi? (4)

Kumbi titenele kugwiriskiya nchitu angoza ndi mphinjika pakumusopa? (5)

Kumbi ndi nthowa ziŵi nizi zo tingamuziŵiya Chiuta? (6)

1. Ŵanthu asopa vinthu vinandi. Kweni Bayibolo lititikambiya kuti pe Chiuta WAUNENESKA yumoza pe. Ndiyu wakulenga vinthu vyosi vyakuchanya ndi vyapacharu chapasi. Pakuti ndiyu wakutipaska umoyu, titenele kusopa iyu pe.​—⁠1 Ŵakorinte 8:​5, 6; Chivumbuzi 4:⁠11.

2. Chiuta wendi mazina ngaulemu nganandi, kweni wendi zina limoza pe. Zina laki ndi YEHOVA. Mu Mabayibolo nganandi, zina laku Chiuta ŵakutuzgamu. Mu malu mwaki, akuŵikamu mazina ngaulemu nge ndi AMBUYA pamwenga CHIUTA. Kweni penipo Bayibolo lalembekanga, zina lakuti Yehova lengamu nyengu zakukwana 7,000.​—⁠Chituwa 3:15; Sumu 83:​18, Baibolo la Buku Lopatulika Ndilo Mau a Mulungu.

3. Yehova wendi liŵavu, kweni ndakupambana ndi lidu. Bayibolo likamba kuti “Chiuta ndi mzimu.” (Yohane 4:24) Mzimu nchamoyu chapachanya ukongwa kuphara taŵanthu. Palivi munthu yo wakuwonapu Chiuta. Yehova waja kuchanya kweni wangawona vinthu vyosi. (Sumu 11:​4, 5; Yohane 1:18) Sonu nanga mzimu utuŵa nchinthu wuli? Ndi munthu nge Chiuta cha. Kweni ndi nthazi waka yo Chiuta wagwiriskiya nchitu.​—⁠Sumu 104:⁠30.

4. Bayibolo lititikambiya umunthu waku Yehova. Lilongo kuti mijalidu yaki yikulu ndi chanju, urunji, vinjeru, ndi nthazi. (Marangu 32:4; Jobu 12:13; Yesaya 40:26; 1 Yohane 4:⁠8) Bayibolo lititikambiyaso kuti ngwa lisungu, wezi, kugowoke, kupaska, ndi kukunthiyapu. Isi nge ŵana ŵakuvwiya titenele kumwezga.​—⁠Ŵaefesu 5:​1, 2.

5. Kumbi titenele kugwiriskiya nchitu angoza, vithuthuzi ndi mphinjika pakusopa? Awa! (Chituwa 20:​4, 5) Yehova wakamba kuti titenele kusopa iyu pe. Wagaŵana unkhankhu waki ndi munthu pamwenga chinthu chechosi cha. Angoza alivi nthazi zakutiwovye.​—⁠Sumu 115:​4-8; Yesaya 42:⁠8.

6. Kumbi tingamuziŵa wuli umampha Chiuta? Nthowa yimoza nkhuwona vyo iyu wakulenga ndi kuŵanaŵaniyapu ukongwa kuti vinthu ivi vititikambiyanji. Vyo Chiuta wakulenga vititilongo kuti wendi nthazi ndi zeru. Tiwona chanju chaki mu vyosi vyo wapanga. (Sumu 19:​1-6; Ŵaroma 1:20) Nthowa yinyaki yo tingaziŵiya Chiuta nkhusambira Bayibolo. Mu Bayibolo, Chiuta watitikambiya vinandi vyaku iyu. Watitikambiyaso khumbu laki ndi vyo wakhumba kuti isi tichitengi.​—⁠Amosi 3:7; 2 Timote 3:​16, 17.

[Vithuzithuzi papeji 5]

Tingamuziŵa Chiuta kuporote mu vyo wakulenga ndi Bayibolo