Sambiru 3
Kumbi Yesu Khristu Ndi Yani?
Nchifukwa wuli Yesu wadanika kuti mwana wakwamba waku Chiuta? (1)
Nchifukwa wuli wadanika “Mazu”? (1)
Kumbi Yesu wanguziyanji pacharu nge munthu? (2-4)
Nchifukwa wuli wachitanga minthondwi? (5)
Kumbi Yesu wazamuchitanji pambula kuswera yapa? (6)
1. Yesu wenga munthu wauzimu kuchanya wechendazi pacharu chapasi. Ndiyu Chiuta wangwamba kumulenga, ndichu chifukwa chaki wadanika mwana waku Chiuta ‘wakupapika dankha,’ pamwenga kuti wakwamba. (Ŵakolose 1:15; Chivumbuzi 3:14) Chiuta wangumulenga yija mwana waki Yesu, kwambula kugwiriskiya nchitu munthu munyaki. Yehova wangugwiriskiya nchitu Yesu nge mumisili pakulenga vinthu vyosi vyakuchanya ndi vyapacharu chapasi. (Nthanthi 8:22-31; Ŵakolose 1:16, 17) Wangumugwiriskiyaso nchitu nge wakumuŵeleŵete waki mura. Ndichu chifukwa chaki wadanika kuti “Mazu.”—Yohane 1:1-3; Chivumbuzi 19:13.
2. Chiuta wangutuma mwana waki pacharu mwakusamisiya umoyu waki mu nthumbu yaku Mariya. Yesu wengavi awiski panu pasi. Ndichu chifukwa chaki wanguleka kwambuwaku ubudi wewosi. Chiuta wangutuma Yesu pacharu pa vifukwa vitatu: (1) Kuzisambiza uneneska waku Chiuta (Yohane 18:37), (2) kusunga kugomezgeka kwaki, alinga kuti watisiliyi chakuwoniyapu kuti tilondo mendelu ngaki (1 Petro 2:21), ndi (3) kupeleka umoyu waki sembi yakutifwatuwa ku ubudi ndi nyifwa. Nchifukwa wuli sembi iyi yenga yakukhumbika?—Mateyu 20:28.
3. Mwakuleka kuvwiya malangu ngaku Chiuta, munthu wakwamba Adamu, wanguchita cho Bayibolo lititi “ulakwi.” Mwaviyo, Chiuta wangumuyeruzgiya ku nyifwa. (Chiyambo 3:17-19) Wangupeleŵela pa mwesu waku Chiuta, ndipu wenga wamphyemphyemu so cha. Kamana ndi kamana, wangwamba kukota ndipu wangufwa. Adamu wangwambuziyaku ŵana ŵaki wosi ubudi. Lekani nasi tikota, kutama, ndi kufwa. Kumbi ŵanthu atingi ataskikengi wuli?—Ŵaroma 3:23; 5:12.
4. Yesu wenga munthu wamphyemphyemu ngepo wenge Adamu wechendanangi. Kweni mwakupambana ndi Adamu, Yesu wanguvwiya Chiuta nanga ndipo wenga pa chiyesu chikulu. Lekani wenga wakwenele kupereka umoyu waki kulipiliya ubudi waku Adamu. Ichi ndichu Bayibolo lititi “uwombozi.” Mwaviyo, ŵana ŵaku Adamu atingi afwatulikengi ku cheruzgu cha nyifwa. Wosi wo avwana mwaku Yesu angagowokereka mphulupulu zawu ndi kuzilonde umoyu wamuyaya.—Ŵakolose 1:14; Yohane 3:16; Ŵaroma 5:18, 19.
5. Po wenga pacharu, Yesu wachizganga ŵakutama, waryiskanga ŵanja, ndi kulekeska mphepu pa nyanja. Wayuskangaso ŵakufwa. Nchifukwa wuli wachitanga minthondwi iyi? (1) Wafwiyanga lisungu ŵanthu ŵakusuzgika ndipu wakhumbanga kuŵawovya. (2) Minthondwi yo wachitanga yalongonga kuti ndi Mwana waku Chiuta. (3) Minthondwi iyi yalongongaso vyo wazamuchitiya ŵanthu ŵakuvwiya po wazamuwusa pacharu.—Mateyu 14:14; Marko 2:10-12; Yohane 5:28, 29.
6. Yesu wangufwa, ndipu Chiuta wangumuyuska nge munthu wauzimu. Pavuli paki wanguwele kuchanya. (1 Petro 3:18) Mukuluta kwa nyengu, Chiuta wangumuŵika kuja Fumu. Pambula kuswera yapa Yesu wazamutuzgapu uheni ndi masuzgu ngosi pacharu.—Sumu 37:9-11; Nthanthi 2:21, 22.
[Vithuzithuzi papeji 7]
Mu uteŵeti waki, Yesu wasambizanga, kuchita minthondwi, ndi kupereka umoyu waki mu malu mwidu