Sambiru 4
Kumbi Diabolo Ndi Yani?
Kumbi Satana Diabolo wakutuliya pani? (1, 2)
Kumbi Satana walandizga wuli ŵanthu? (3-7)
Nchifukwa wuli mutenele kumukanizga Diabolo? (7)
1. Mazu ngakuti “diabolo” ngang’anamuwa munthu mweniyo kanandi wapusikizgiya munyaki. Mazu ngakuti “satana” ngang’anamuwa murwani pamwenga wakususka. Murwani mura waku Chiuta ndiyu wakupaskika mazina yanga. Pakwamba wenga mungelu wamphyemphyemu. Wajanga kuchanya ndi Chiuta. Kweni pavuli paki wangwamba kujitukumuwa ndipu wakhumbanga kuti ŵanthu asopengi iyu, mu malu mwakusopa Chiuta yo ngwakwenele kumusopa.—Mateyu 4:8-10.
2. Satana wangulongolo ndi Eva kuporote mu njoka. Mwa kumukambiya maboza, wangumunyenga kuti wapandukiyi Chiuta. Mwaviyo, Satana wanguyukiya “muwusu” waku Chiuta. Satana wangukayika kuti Chiuta wawusa mwakwenele, ndipuso asani waŵanaŵaniya ŵanthu ŵaki. Wangukayikiyaso kuti ŵanthu ŵangalutiliya kuŵa ŵakugomezgeka kwaku Chiuta. Pa chifukwa ichi, Satana wakujipanga kuŵa murwani waku Chiuta. Ndichu chifukwa chaki wadanika Satana Diabolo.—Chiyambo 3:1-5; Jobu 1:8-11; Chivumbuzi 12:9.
3. Satana wakopa ŵanthu kuti amusopengi. (2 Ŵakorinte 11:3, 14) Nthowa yimoza yo walandizgiya nayu ŵanthu nkhuporote mu chisopa chaboza. Asani chisopa chisambiza maboza pakukamba vyaku Chiuta, ndikuti chiteŵete Satana. (Yohane 8:44) Ŵanthu wo wemu visopa vyaboza, angagomezga ndi mtima wosi kuti asopa Chiuta wauneneska. Kweni ateŵete Satana. Iyu ndi ‘chiuta wa mgonezi wunu.’—2 Ŵakorinte 4:4.
4. Nthowa yinyaki yo Satana walandizgiya nayu ŵanthu nkhugomezga mizimu. Ŵanthu angapempha mizimu kuti yiŵavikiriyi, kupweteka anyawu, kulose vyakunthazi pamwenga kuchita masalamusi. Satana ndiyu walongozga vyosi ivi. Kuti tikondweski Chiuta, titenele kuleke limu kuchita chechosi chakukwasana ndi kugomezga mizimu.—Marangu 18:10-12; Machitidu 19:18, 19.
5. Satana walandizgaso ŵanthu mwakuŵapangiska kuŵa ŵakujanja chifukwa cha mtundu wawu, ndi kugomezga mawupu nga ndali. Anyaki atijivwa kuti mtundu wawu ndiwu uphara mitundu yinyaki yosi. Kweni uwu mbuneneska cha! (Machitidu 10:34, 35) Anyaki agomezga kuti mawupu nga ndali ndingu ngangatuzgapu masuzgu nga ŵanthu. Mwakuchita viyo, ŵakana Ufumu waku Chiuta. Ndi Ufumu waku Chiuta pe wo ungatuzgapu masuzgu ngidu.—Danyele 2:44.
6. Nthowa yinyaki yo Satana walandizgiya nayu ŵanthu nkhuŵayesa ndi makhumbiru ngaheni. Yehova waziŵa kuti vinthu viheni vingatipweteka, lekani watititcheŵeska kuti tileki kuvichita. (Ŵagalatia 6:7, 8) Ŵanthu anyaki angakunyengani kuti muchitengi nawu vinthu viheni. Kweni kumbukani kuti Satana ndiyu wakhumba kuti muchitengi vinthu ivi.—1 Ŵakorinte 6:9, 10; 15:33.
7. Satana wangagwiriskiyaso nchitu masuzgu ndi kususkika kuti mumuleki Yehova. Akwanjiwa ŵinu anyaki angakwiya chifukwa chakuti musambira Bayibolo. Anyaki angamupheriyani pamwenga kumuwerani. Kweni kumbi ndi yani yo wakukupaskani umoyu? Satana wakhumba waka kukuwofyani kuti muleki kusambira vyaku Yehova. Lekani kumuzomereza Satana kuti wakuthereskeni. (Mateyu 10:34-39; 1 Petro 5:8, 9) Asani mumukanizgengi Diabolo, mukondweskengi Yehova ndi kulongo kuti mukoliyana ndi muwusu waki.—Nthanthi 27:11.
[Vithuzi papeji 9]
Ŵanthu alandizgika ndi chisopa cha boza, kugomezga mizimu ndi kujanja chifukwa cha mtundu wawu
[Chithuzi papeji 9]
Mukanizgeni Satana mwa kulutiliya kusambira vyaku Yehova