Sambiru 5
Kumbi Khumbu Laku Chiuta la Charu Chapasi Ndakuti Wuli?
Kumbi Yehova wangulengiyanji charu chapasi? (1, 2)
Nchifukwa wuli charu che paradayisu cha sonu? (3)
Nchinthu wuli cho chazamuchitikiya ŵanthu aheni? (4)
Kumbi Yesu wazakuŵachitiyanji akutama, akukota, ndi ŵakufwa kunthazi? (5, 6)
Kumbi mutenele kuchitanji kuti muzilonde vitumbiku vya kunthazi? (7)
1. Yehova wangulenga charu kuti ŵanthu ajengemu mwakukondwa kwamuyaya. Chiuta wakhumbanga kuti pacharu pajengi ŵanthu ŵarunji ndi ŵalikondwa nyengu zosi. (Sumu 115:16; Yesaya 45:18) Charu chazamunangika cha, chijaririyengi muyaya.—Sumu 104:5; Wakutaula 1:4.
2. Chiuta wechendalengi munthu, wangusankha kachigaŵa kamanavi pacharu ndi kukapanga paradayisu wakutowa. Wangukadana kuti munda wa Edeni. Ndimu wanguŵika ŵanthu ŵakwamba, Adamu ndi Eva. Khumbu laku Chiuta lenga lakuti abali ŵana ndi kuzaza charu chosi chapasi. Kamana ndi kamana, yiwu atingi asambusengi charu chosi chapasi kuŵa paradayisu.—Chiyambo 1:28; 2:8, 15.
3. Mwakuswiya dala dangu laku Chiuta, Adamu ndi Eva angubuda. Lekani Yehova wanguŵatuzgamu mu munda wa Edeni. Paradayisu wangumaliya penipo. (Chiyambo 3:1-6, 23) Kweni Yehova wakuluwa cha khumbu laki lo wangulenge charu chapasi. Phanganu laki ndakuti wachipangengiso paradayisu, mwenimo ŵanthu ŵazamuja kwamuyaya. Kumbi wazamuchita wuli kuti charu chiziŵiso paradayisu?—Sumu 37:29.
4. Charu ichi chechendaŵi paradayisu, Chiuta wazamutuzgapu dankha ŵanthu aheni. (Sumu 37:38) Ivi vyazamuchitika pa Haramagedoni. Iyi ndi nkhondu yaku Chiuta yakutuzgapu uheni. Pavuli paki, Satana wazamumangika kwa vyaka 1,000. Ichi ching’anamuwa kuti kwazamuŵavi ŵanthu aheni wo ŵazamunanga charu. Ŵanthu ŵaku Chiuta pe ndiwu ŵazamupozomoka.—Chivumbuzi 16:14, 16; 20:1-3.
5. Pavuli paki, Yesu Khristu wazamuwusa charu chapasi kwa vyaka 1,000. (Chivumbuzi 20:6) Kamana ndi kamana, wazamutuzgapu uheni wosi mu maŵanaŵanu ndi mu maliŵavu ngidu. Tazamukuŵa ŵamphyephyemu ngemo Adamu ndi Eva ŵenge, ŵechendanangi. Asani vyazichitika ivi, kwazamuŵavi matenda, ukoti, ndi nyifwa. Akutama azamuchizgika, akukota azamuwele ku uhurwa pamwenga ku unamana.—Jobu 33:25; Yesaya 33:24; Chivumbuzi 21:3, 4.
6. Mu muwusu waku Yesu wa vyaka 1,000, ŵanthu ŵakugomezgeka ŵazamugwira nchitu yakusambuska charu kuŵa paradayisu. (Luka 23:43) Ndipuso, wumba wa ŵanthu ŵakufwa wazamuyuka ndikuja ndi umoyu pacharu. (Machitidu 24:15) Asani ŵazamuchita vyo Chiuta wakhumba, ŵazamuja ndi umoyu wamuyaya. Asani ŵazamuleka kuvwiya, ŵazamukufwa.—Yohane 5:28, 29; Chivumbuzi 20:11-15.
7. Khumbu laku Chiuta la pakwamba la charu chapasi lazamufiskika. Kumbi namwi mungayanja kuzilonde vitumbiku vyakunthazi ivi? Asani ndi viyo, mutenele kulutiliya kusambira vyaku Yehova ndi kuvwiya malangu ngaki. Kulutanga ku maunganu nga Akaboni ŵaku Yehova, kukuwovyeningi kuchita vyo Chiuta wakhumba.—Yesaya 11:9; Ŵahebere 10:24, 25.
[Chithuzi papeji 10]
Paradayisu wangumara
[Vithuzi papeji 11]
Pavuli pa Haramagedoni, charu chapasi chazamukuŵa paradayisu