Sambiru 6
Kumbi Ufumu Waku Chiuta Nchinthu Wuli?
Kumbi Ufumu waku Chiuta wepani? (1)
Fumu yaki ndi yani? (2)
Kumbi pe anyaki wo azamuwusa ndi Fumu iyi? Asani ndi viyo, mbalinga? (3)
Kumbi ndi vinthu wuli vyo vilongo kuti te mu mazuŵa ngakumaliya? (4)
Kumbi Ufumu waku Chiuta wazakuŵachitiyanji ŵanthu kunthazi? (5-7)
1. Po wenga pacharu, Yesu wangusambiza akusambira ŵaki kupemphere ufumu waku Chiuta. Ufumu ndi boma lo liwusika ndi fumu. Ufumu waku Chiuta ndi boma lapade. We kuchanya ndipu wazamuwusa charu chapasi. Ufumu uwu, wazamupangiska kuti zina laku Chiuta litumbikiki pamwenga kupaturika. Wazamupangiskaso kuti khumbu laku Chiuta lichitiki panu pasi ngemo kuliri kuchanya.—Mateyu 6:9, 10.
2. Chiuta wanguti Yesu wazamukuŵa Fumu ya Ufumu Waki. (Luka 1:30-33) Po wenga panu pacharu, Yesu wangulongo kuti wazamukuŵa Fumu yalisungu, yambura kwanjiya ndipuso yambula ubudi. Wati wawere kuchanya, wangwamba kuwusa nyengu yeniyo cha. (Ŵahebere 10:12, 13) Mu 1914 ndimu Yehova wangumupaskiya Yesu Ufumu wo wangupangana nayu. Kutuliya mu chaka ichi, Yesu wakwamba kuwusa kuchanya nge Fumu yakuŵikika ndi Yehova.—Danyele 7:13, 14.
3. Yehova wasankhaso anthurumi ndi anthikazi akugomezgeka pacharu chapasi kuti aluti kuchanya. Ŵazamuwusa charu chapasi pamoza ndi Yesu nge mafumu, ŵeruzgi, ndi asembi. (Luka 22:28-30; Chivumbuzi 5:9, 10) Yesu wangudana akuwusa nawu yaŵa, kuti “kamskambu kamana.” Wosi pamoza alipu 144,000.—Luka 12:32; Chivumbuzi 14:1-3.
4. Wati wayamba waka kuwusa, Yesu wanguwiskiya Satana ndi angelu ŵaki aheni pacharu chapasi. Ndichu chifukwa chaki vinthu vyanangika ukongwa panu pacharu kuturiya mu 1914. (Chivumbuzi 12:9, 12) Nkhondu, nja, milili, ndi uchikana malangu, vyosi ivi ‘nchisimikizgu’ chakuti Yesu wawusa ndipuso kuti temu mazuŵa ngakumaliya nga mgonezi wunu.—Mateyu 24:3, 7, 8, 12; Luka 21:10, 11; 2 Timote 3:1-5.
5. Pambura kuswera yapa, Yesu wazamuyeruzga ŵanthu, kuŵapatuwa ngemo mliska wapaturiya mberere ndi mbuzi. “Mberere” zimiya ŵanthu ŵakugomezgeka. Yiwu ŵazamulonde umoyu wamuyaya pacharu chapasi. “Mbuzi” zimiya ŵanthu wo ŵazamukana Ufumu waku Chiuta. (Mateyu 25:31-34, 46) Sosonukweni yapa, Yesu wazamutuzgapu wosi ŵange mbuzi. (2 Ŵatesalonika 1:6-9) Asani mukhumba kuja yumoza wa “mberere” zaku Yesu, mutenere kuvwisiya uthenga wa Ufumu ndi kuchita vyo musambira.—Mateyu 24:14.
6. Charu chapasi chikugaŵika mu vyaru vinandi. Charu chechosi chendi boma laki. Vyaru ivi kanandi virwana. Kweni Ufumu waku Chiuta wazamusere mu malu mwa maboma ngosi nga ŵanthu. Yiwu pe ndiwu wazamuwusa charu chosi chapasi. (Danyele 2:44) Ndipu kwazamuŵavi nkhondu, uchigaŵenga, ndi viwawa. Ŵanthu wosi ŵazamuja pamoza mu chimangu.—Mika 4:3, 4.
7. Mu muwusu waku Yesu wa vyaka 1,000, ŵanthu akugomezgeka azamukuŵa amphyemphyemu. Charu chosi chazamukuŵa paradayisu. Asani vyaka 1,000 vyamala, Yesu wazamuja kuti wachita vyosi vyo Chiuta wangumutuma. Pavuli paki wazamupereka Ufumu kwa awiski. (1 Ŵakorinte 15:24) Kumbi mungakambiyaku cha anyinu vyo Ufumu waku Chiuta wazamuchita?
[Chithuzi papeji 13]
Mu muwusu waku Yesu kwazamuŵavi kutinkhana pamwenga kusankhana