Sambiru 7
Kundele Kwaku Chiuta mu Rombu
Nchifukwa wuli kuromba nyengu zosi nkhwakuzirwa? (1)
Kumbi titenele kuromba kwaku yani, ndipu tingaromba wuli? (2, 3)
Kumbi ndi vinthu wuli vyo mungazumbuwa mu rombu? (4)
Kumbi mutenele kuromba nyengu wuli? (5, 6)
Kumbi Chiuta watuvwa marombu ngosi? (7)
1. Rombu nkhulongolo ndi Chiuta mwakujiyuyuwa. Mutenele kuromba kwaku Chiuta nyengu zosi. Asani muromba mungajivwa kuti mwenayu pafupi nge mubwezi winu wa pamtima. Chinanga wuli Yehova ndi mura ukongwa ndipuso wendi mazaza ngakuru, kweni wavwisiya marombu ngidu. Kumbi muromba kwaku Chiuta nyengu zosi?—Sumu 65:2; 1 Ŵatesalonika 5:17.
2. Rombu nchigaŵa cha kusopa kwidu. Mwaviyo, titenele kuromba kwaku Yehova Chiuta pe. Po Yesu wenga pacharu warombanga kwa awiski pe, ku munthu munyaki cha. Ndipu nasi titenele kuchitiya. (Mateyu 4:10; 6:9) Kweni ndipuwuli, pa tiromba titenele kuporote mu zina laku Yesu. Ichi chilongo kuti tizirwiska mazaza ngo Yesu wenangu, ndipuso kuti tendi chivwanu mu sembi yaki.—Yohane 14:6; 1 Yohane 2:1, 2.
3. Asani tiromba titenele kulongolo ndi Chiuta kutuliya pasi pamtima. Marombu ngidu ngangaŵanga ngakwesa kusunga pamtima pamwenga kuŵelenga mu buku cha. (Mateyu 6:7, 8) Asani tiromba, tingaja mumujalidu wewosi wa ulemu. Tingaromba nyengu yeyosi ndipuso pa malu ngengosi ngo tingaŵa. Chiuta watuvwa nanga ndi pa tiromba chamu mtima. (1 Samuele 1:12, 13) Chituŵa umampha kuluta pa malu ngambula chiwawa asani tikhumba kuromba rombu lakutija.—Marko 1:35.
4. Kumbi ndi vinthu wuli vyo mungazumbuwa mu rombu? Chechosi chakukwaskana ndi ubwezi winu ndi Yehova. (Ŵafilipi 4:6, 7) Rombu lakuyeruzgiyapu laku Yesu, lilongo kuti titenele kurombe zina ndi khumbu laku Yehova. Tingamupemphaso kuti watipaski vyakusoŵa vidu vyakuliŵavu, kutigowoke mphulupulu, ndipuso kuti watiwovyi asani titeseka. (Mateyu 6:9-13) Marombu ngidu ngangaŵanga nga mbunu cha, kweni ngatenele kukoliyana ndi khumbu laku Chiuta.—1 Yohane 5:14.
5. Mungaromba nyengu yeyosi yo mtima winu wakutumani kuwonga pamwenga kulumba Chiuta. (1 Mikoka 29:10-13) Mungaromba asani mwendi masuzgu kweniso asani chivwanu chinu chiteseka. (Sumu 55:22; 120:1) Mbumampha kuromba mwechendaryi chakurya. (Mateyu 14:19) Yehova watitipempha kuti tirombengi ‘nyengu zosi.’—Ŵaefesu 6:18.
6. Titenele kuromba weniukongwa asani tabuda. Panyengu iyi titenele kuŵeyele Yehova kuti watifwiyi lisungu ndi kutigowoke. Asani tizomera pamwenga kusumuwa mphulupulu zidu, ndi kuyesesa kuleka kuwelezgapuso, Chiuta ngwakunozgeka ‘kugowoka.’—Sumu 86:5; Nthanthi 28:13.
7. Yehova wavwisiya marombu nga ŵanthu ŵarunji pe. Kuti Chiuta wavwi marombu nginu, mutenele kuyesesa kusunga malangu ngaki. (Nthanthi 15:29; 28:9) Mutenele kujiyuyuwa pakuromba. (Luka 18:9-14) Mutenele kuchita mwakukoliyana ndi vyo muromba. Asani muchitengi viyo, mulongongi kuti mwendi chivwanu ndipuso kuti mukhumba nadi vyo muromba. Ndipu pija Yehova wangamuka marombu nginu.—Ŵahebere 11:6.