Sambiru 9
Ateŵeti Ŵaku Chiuta Atenele Kuŵa Atuŵa Ndipuso Achanda
Nchifukwa wuli titenele kuŵa atuŵa ndi achanda mu vyakuchita vidu vyosi? (1)
Kumbi ching’anamuwanji kuŵa atuŵa mwauzimu? (2) Atuŵa mu kajalidu? (3) atuŵa mu maŵanaŵanu? (4) achanda ku liŵavu? (5)
Nkhaŵeleŵeteru wuli ko titenele kukhwecha? (6)
1. Yehova Chiuta ndi mutuŵa ndipuso ngwakupaturika. Wakhumba kuti wo atimusopa aŵengi atuŵa mwauzimu, kajalidu, maŵanaŵanu, ndi achanda ku liŵavu. (1 Petro 1:16; Ŵalevi 11:44) Titenele kufwililiyapu ukongwa kuti tiŵi atuŵa pamasu paku Chiuta. Tija mu charu chikazuzi, kweniso tilimbana ndi chiziŵirizga chakuchita vinthu viheni. Kweni tingafwanga mphwayi cha.
2. Atuŵa Mwauzimu: Asani tikhumba kuteŵete Yehova, tingangangamiyanga ku visambizu pamwenga midawuku ya chisopa cha boza cha. Titenele kutuwamu muchisopa chaboza ndi kuleke limu kukoliyana nachu mu nthowa yeyosi. (2 Ŵakorinte 6:14-18; Chivumbuzi 18:4) Asani tasambira uneneska, titenele kutcheŵa kuti tileki kulandizgika ndi ŵanthu wo asambiza maboza.—2 Yohane 10, 11.
3. Atuŵa mu Kajalidu: Yehova wakhumba kuti wo atimusopa achitengi vinthu nge Mbakhristu awuneneska nyengu zosi. (1 Petro 2:12) Wawona vyosi vyo tichita, ndi vya ku ubendi viyo. (Ŵahebere 4:13) Titenele kukhwecha uleŵi ndi maukazuzi nganyaki ngosi nga mu charu.—1 Ŵakorinte 6:9-11.
4. Atuŵa mu Maŵanaŵanu: Asani tiŵanaŵana vinthu vyamampha nyengu zosi, mbwenu vyakuchita vidu navu viŵengi vyamampha. (Ŵafilipi 4:8) Kweni asani tijaliya kuŵanaŵana vinthu vyaukazuzi, vyakuchita vidu navu viŵengi vyaukazuzi. (Mateyu 15:18-20) Titenele kukhwecha vyakusangaluska vyo vingananga maŵanaŵanu ngidu. Kusambira mazu ngaku Chiuta kungatovya kuti tiŵanaŵanengi vinthu vyamampha.
5. Achanda ku Liŵavu: Chifukwa chakuti Akhristu amiya Chiuta, atenele kusamba ndi kuchapa vyakuvwara. Titenele kusamba mu manja asani tatuwa ku chimbuzi, techendaryi ndipuso techendako chakurya. Asani tilivi chimbuzi, titenele kukumbiya pasi ndi kuwundiya epa tamara kujovya. (Marangu 23:12, 13) Uchanda utitovya kuti tiŵi ndi umoyu wamampha. Nyumba ya Mukhristu yitenele kuŵa yakutowa kubwalu ndi mukati viyo. Yitenele kuŵa yakuwoniyapu mu chigaŵa.
6. Atuŵa mu Kaŵeleŵeteru: Ateŵeti ŵaku Chiuta atenele kukamba uneneska nyengu zosi. Ŵanthu aboza azamusele cha mu Ufumu waku Chiuta. (Ŵaefesu 4:25; Chivumbuzi 21:8) Akhristu alongoro mazu ngakunyoza pamwenga ngakutuka cha. Avwisiya pamwenga kukamba njerengu ndi nkhani zawakawaka cha. Chifukwa chakuti alongoro vyamampha pe, apambana ndi anyawu wosi ku nchitu, ku sukulu, ndi ko ŵaja.—Ŵaefesu 4:29, 31; 5:3.
[Vithuzithuzi papeji 18, 19]
Ateŵeti ŵaku Chiuta atenele kuŵa atuŵa ndi achanda mu vyakuchita vyawu vyosi