Sambiru 10

Vinthu Vyo Chiuta Watinkhana Navu

Kumbi mutenele kuviwona wuli vinthu vyo Chiuta watiti ndi viheni? (1)

Kumbi ndi mitundu wuli yakugonana yo njiheni? (2)

Kumbi Mukhristu watenele kuviwona wuli vinthu ivi: boza? (3) juga? (3) kuba? (3) viwawa? (4) kugomezga mizimu? (5) kuloŵe? (6)

Kumbi tingafwatukaku wuli ku vinthu viheni? (7)

1. Ateŵeti ŵaku Chiuta atanja vyamampha. Kweniso atenele kusambira kutinkha viheni. (Sumu 97:10) Ichi ching’anamuwa kuti atenele kukhwecha vinthu vyo Chiuta watinkha. Kumbi vinyaki mwa vinthu ivi, ndi nivi?

2. Uyaya: Kugonana kwa ŵanthu ŵambura kutorana, ureŵi, kugona nyama, kugonana ndi wachibali, ndi kugonana ndi munthurumi pamwenga munthikazi munyaku, mbubudi ukuru pamasu paku Chiuta. (Ŵalevi 18:6; Ŵaroma 1:​26, 27; 1 Ŵakorinte 6:​9, 10) Asani ŵanthu akusomphorana waka, atenele kupatukana pamwenga kutorana mwakulondo dangu la boma.​—⁠Ŵahebere 13:⁠4.

3. Boza, juga, kuba: Yehova Chiuta wapusika cha. (Tito 1:⁠2) Ŵanthu wo akhumba kwanjika ndi Chiuta, atenele kukhwecha kukamba boza. (Nthanthi 6:​16-19; Ŵakolose 3:​9, 10) Mtundu wewosi wa juga nchiŵinu pamwenga mbunu. Mwaviyo, Akhristu achitaku cha malotale, chukucha, ndi mtundu unyaki wewosi wa juga. (Ŵaefesu 5:​3-5) Ndipuso, Akhristu atuba cha. Aguliya dala cha vinthu vyo aziŵa kuti vyakuba, pamwenga kuto vinthu vyaŵeni kwambula kupempha.​—⁠Chituwa 20:15; Ŵaefesu 4:⁠28.

4. Kufya Mtima ndi Viwawa: Kukwiya kwambula kujiweza kungapangiska munthu kuchita viwawa. (Chiyambo 4:​5-8) Munthu waviwawa wangaŵa mubwezi waku Chiuta cha. (Sumu 11:5; Nthanthi 22:​24, 25) Nkhunanga kuweze vinthu viheni vyo anyidu atichitiya.​—⁠Nthanthi 24:29; Ŵaroma 12:​17-21.

5. Nyanga ndi Kugomezga Mizimu: Ŵanthu anyaki apempha chovyu ku mizimu epa atama. Anyaki alowa arwani ŵawu kuti aŵabayi pamwenga kuŵatamisa. Satana ndiyu wachitiska vyosi ivi. Lekani Akhristu atenele kuchitaku nawu cha vinthu ivi. (Marangu 18:​9-13) Kuŵa pa ubwezi wapamtima ndi Yehova kungativikiliya asani ŵanthu akhumba kutilowa.​—⁠Nthanthi 18:⁠10.

6. Kuloŵe: Nkhunanga cha kumwapu kamanavi vinyu ndi moŵa. (Sumu 104:15; 1 Timote 5:23) Kweni kumwa ukongwa ndi kuloŵe nkhunangiya Chiuta. (1 Ŵakorinte 5:​11-13) Kumwa ukongwa moŵa kungananga umoyu winu ndipuso kungatimbanyizga mbumba yinu. Kungapangiskaso kuti mutheri liŵi pa mwakumana ndi viyesu.​—⁠Nthanthi 23:​20, 21, 29-35.

7. Ŵanthu wo achita vinthu vyo Chiuta watinkha ‘azamuhara ufumu waku Chiuta cha.’ (Ŵagalatia 5:​19-21) Asani mutimwanja nadi Chiuta ndipu mukhumba kumukondweska, mukhoza kufwatukaku ku vinthu ivi. (1 Yohane 5:⁠3) Sambirani kutinkha vinthu vyo Chiuta watiti ndi viheni. (Ŵaroma 12:⁠9) Yanjanani ndi ŵanthu wo atanja vinthu vyauzimu. (Nthanthi 13:20) Akhristu wo mbakukhwima mwauzimu angamuwovyani. (Yakobe 5:14) Kwakuluska vyosi, thamiyani Chiuta mwa kuromba.​—⁠Ŵafilipi 4:​6, 7.

[Vithuzithuzi papeji 20, 21]

Chiuta watinkha kuloŵe, kuba, juga, ndi viwawa