Sambiru 14
Mo Akaboni Ŵaku Yehova Atendeske Vinthu
Kumbi Akaboni ŵaku Yehova ŵamazuŵa nganu akwamba zukwanji? (1)
Kumbi mawunganu nga Akaboni ŵaku Yehova ngachitika wuli? (2)
Kumbi ndalama zo alipiliya vinthu zituwa pani? (3)
Kumbi mbayani wo alongozga mu mpingu? (4)
Kumbi ndi mawunganu ngakurungakuru nanga ngo ngachitika pa chaka? (5)
Kumbi ku likuru ndi maofesi ngawu nga nthambi kuchitika nchitu wuli? (6)
1. Akaboni ŵaku Yehova ŵamazuŵa nganu akwamba cha muma 1870. Pakwamba, aziŵikanga ndi zina lakuti ŵakusambira Bayibolo. Kweni kutuliya mu 1931, angwamba kuziŵika ndi zina la mu Malemba lakuti Akaboni ŵaku Yehova. (Yesaya 43:10) Pakwamba ŵenga amanavi waka, kweni sonu pe Akaboni mamiliyoni nganandi, wo amemeza Ufumu waku Chiuta mu vyaru vyakujumpha 230.
2. Mipingu yinandi ya Akaboni ŵaku Yehova yiwungana katatu pa sabata. Mwe ŵakulondereka kufikapu pa mawunganu yanga. (Ŵahebere 10:24, 25) Vyo visambizika pa mawunganu yanga vituliya mu Bayibolo. Mawunganu ngatamba ndi kumara ndi rombu. Pa mawunganu nganandi pambika ‘sumu zauzimu.’ (Ŵaefesu 5:18, 19) Kusere nkhwawezi, ndipu patuŵavi mbali za mpasku.—Mateyu 10:8.
3. Mipingu yinandi yichitiya mawunganu mu Nyumba za Ufumu. Kanandi Nyumba izi zizengeka ndi Akaboni ŵakujipereka. Mu Nyumba za Ufumu mutuŵavi mphinjika ndi angoza a mutundu wewosi. Ndalama zo alipiliya vinthu zituwa ku vyakupereka vyawanangwa. Kwaku wo akhumba kupereka chovyu, patuŵa bokosi lakuponyamu vyawanangwa.—2 Ŵakorinte 9:7.
4. Mu mpingu wewosi mutuŵa ŵara. Yiwu alongozga pakusambiza mu mpingu. (1 Timote 3:1-7; 5:17) Atovyeka ndi ateŵeti akovya. (1 Timote 3:8-10, 12, 13) Ŵara ndi ateweti akovya atuŵa pachanya pa ŵanthu wosi cha mu mpingu. (2 Ŵakorinte 1:24) Adanika mazina ngapade chifukwa cha udindu wo ŵenawu cha. (Mateyu 23:8-10) Avwara vyakupambana ndi ŵanthu ŵanyaki cha. Kweniso, alipilika cha chifukwa cha nchitu yo achita. Ŵara atijipereka kuphwere mpingu mwauzimu. Apembuzga ndi kupereka ulogozgi pa nyengu ya masuzgu.—Yakobe 5:14-16; 1 Petro 5:2, 3.
5. Akaboni ŵaku Yehova atuŵaso ndi mawunganu ngakurungakuru chaka chechosi. Pa mawunganu yanga mipingu yinandi yiwungana pamoza kuti yivwisiyi ulongozgi wapade kutuwa mu Bayibolo. Patuŵaso ubatizu waku wo ajipereka kwaku Chiuta.—Mateyu 3:13-17; 28:19, 20.
6. Likuru la Akaboni ŵaku Yehova le ku New York. Ku likuru lawu ndiku kwe Wupu Wakulongozga. Wupu Wakulongozga ndi gulu la ŵara wo aphwere mipingu yosi ya Akaboni ŵaku Yehova pacharu chosi chapasi. Kuzunguliya charu chosi chapasi, pe so maofesi nga nthambi ngakujumpha 100. Ku malu yanga, Akaboni akujipereka asindikiza ndi kutumizga mabuku ngakukonkhoska Bayibolo. Ndipuso, ku maofesi yanga ndiku kutuliya ulongozgi wa mwenimo nchitu yakumemeza Ufumu waku Chiuta yingachitikiya. Kumbi munganozga cha ulendu kuti mukawoni nthambi yo mwenayu kufupi?