Chiuta Wanguvikiliya Yesu

NYENGU zinyaki Yehova wachita vinthu mwakuziziswa kuti wavikiliyi ŵana ndipuso ŵanthu wo atondeka kujivikiliya. Asani ungayendayenda mudondu, ungawona chakuwoniyapu cho chilongo mo Yehova wachitiya venivi. Kweni pakwamba ungavwisa cha vo vichitika.

Mwakuyeruzgiyapu, ungawona kayuni ko kepasi pafupi ukongwa ndi yiwi. Kangawoneka nge kuti kapwetekeka. Ndipu po undere kufupi, kangayamba kundere mwakusuzgikiya. Kweni po ulutirizga kundere kufupi ukongwa, mbwe naku kalutirizga kundere patali. Mbwenu pakumaliya, kaphuluruka ndi kuthaŵa. Kayuni ko kenga umamphaumampha waka! Kumbi wachiziŵa chifukwa cho kachitiya venivi?—

Kanguchita venivi chifukwa pafupi ndi po yiwi unguma penga tiŵana taki. Sonu yiku kawopanga kuti ungatiwona ndipu panyaki ungatipweteka. Mwaviyo, kangupusikiziya nge kuti kapwetekeka kuti ulondo yiku, kuti uleki kuwona tiŵana taki. Kumbi utimuziŵa yo wangavikiliya isi taŵanthu kuluska mo kayuni kachitiya ndi ŵana ŵaki?— Bayibolu liyeruzgiya Yehova ndi chiyuni chinyaki cho chiziŵika kuti nombu, chiyuni chenichi chitovya ŵana ŵaki.—Dotoronome 32:11, 12.

Yesu ndi Mwana wapade waku Yehova. Pa nyengu yo Yesu wenga kuchanya, wenga mungelu wanthazi. Ndipu watingi wafiskengi kujivikiliya. Kweni wati wabalika nge munthu panu pacharu chapasi, watingi wafiskengi cha kujivikiliya. Iyu wakhumbikanga munthu munyaki kuti wamuvikiliyi.

Yesu wakhumbikanga kuti wakuwi dankha ndi kuja munthu wakufikapu kuti wafiski vo Chiuta wangumutuma kuti wazichiti panu pacharu. Kweni Satana wanguyesesa kuti wabayi Yesu weche munamana. Ungakondwa ukongwa kuvwa nkhani yeniyi kweniso vo Yehova wanguchita kuti wavikiliyi mwana waki. Kumbi ungayanja kuti ndikukonkhoske?—

Pati pajumpha waka nyengu yimanavi kutuliya po Yesu wanguwiya, Satana wanguchitiska kuti nyenyezi yiwoneki Kuvuma. Ŵanthu a kuvuma wo asandanga nyenyezi angulondo nyenyezi yeniyi kutuwa kutali mpaka kufika ku Yerusalemu. Ŵati afika kwenuku, yiwu angwamba kufumba kuti aziŵi ko kwatingi kuwiyengi mwana yo alindizanga kuti waŵengi fumu ya Ayuda. Yiwu ŵati afumba ŵanthu wo aziŵanga Bayibolu, anguŵamuka kuti: “Ku Betelehemu.”—Mateyu 2:1-6.

Herodi yo wenga fumu yiheni ya ku Yerusalemu, wanguvwa kuti mutawuni yapafupi ya Betelehemu, mwe mwana yo wazamuja fumu. Sonu iyu wangukambiya akusanda nyenyezi kuti: “Lutani mukamupenji . . . mwana yo, asani mwachimusaniya muzindikambiyi.” Kumbi waziŵa chifukwa cho Herodi wapenjiyanga kuziŵa ko kwenga Yesu?— Chenga chifukwa chakuti iyu wenga ndi sanji ndipu wakhumbanga kumubaya!

Kumbi uwona kuti Chiuta wanguchita wuli kuti wavikiliyi Mwana waki?— Akusanda nyenyezi ŵati amusaniya Yesu, angumupaska mphasu. Pavuli paki, Chiuta wanguŵatcheŵeska kuziya mu malotu kuti angaweriyanga so kwaku Herodi cha. Mwaviyo, mumalu mwakujumpha ku Yerusalemu, yiwu angujumpha nthowa yinyaki achiwere kwawu. Herodi wati waziŵa kuti akusanda nyenyezi aluta, wangukwiya ukongwa. Sonu kuti wabayi Yesu, Herodi wangulamula kuti ŵana wosi anthulumi wo ŵechendakwanisi vyaka viŵi mutawuni ya Betelehemu, abayiki! Kweni pa nyengu iyi ndipu Yesu watuwamu kali mu Betelehemu.

Kumbi utiviziŵa vo vinguchitika kuti Yesu watuwemu mu Betelehemu?— Akusanda nyenyezi ŵati atuwaku waka, Yehova wangukambiya Yosefi yo wenga mulumu waku Mariya kuti athaŵiyi ku Ijipiti. Chifukwa chakuthaŵiya kwenuku, Yesu wangupona kwaku Herodi. Pati pajumpha vyaka vinandi, Yosefi ndi Mariya anguweku ku Ijipiti. Kweni pa nyengu iyi napu Chiuta wangumutcheŵesa so Yosefi. Chiuta wangukambiya Yosefi mumalotu kuti aluti ku Nazareti kuti Yesu waleki kubayika.—Mateyu 2:7-23.

Kumbi wawona vo Yehova wanguchita kuti wavikiliyi Mwana waki?— Kumbi uziŵa kuti nawi uyanana ndi tiŵana ta kayuni to nyinawu watitivikiliya mudondu, kweniso kuti uyanana ndi Yesu pa nyengu yo iyu wenga munamana?— Ndikamba viyo, chifukwa nawi pe ŵanthu anyaki wo akhumba kukuchitiya vinthu viheni. Kumbi utiŵaziŵa?—

Bayibolu likamba kuti Satana we nge nkharamu yakukoloma yo yipenja kutirya. Wakumbuka, kanandi nkharamu yitanja kuko tiŵana ta nyama, Satana ndi viŵanda vaki nawu atanja kuyukiya ŵana. (1 Peturo 5:8) Kweni Yehova ngwanthazi kuluska Satana. Yehova wangavikiliya ŵana ŵaki kweniso wanganozga vinthu viheni vo Satana wangaŵachitiya.

Kumbi wakumbuka kuti mu Mutu 10 tikusambira kuti Dyaboli ndi viŵanda vaki atitinyengezere kuti tichitengenji?— Hinya, yiwu akhumba kuti tigonanengi bweka, kweni Chiuta wakana kuchita venivi. Kumbi mbayani pe wo akhumbika kugonana?— Waneneska, ndi munthulumi ndi munthukazi wo akutorana pe.

Kweni ntchachitima kuti ŵanthu anyaki arara agonana ndi ŵana. Asani yiwu achita venivi, ŵana atamba kuchita vinthu viheni vo asambira ku ŵanthu ŵenaŵa. Ndipu atamba kugwiriskiya ntchitu viŵalu vawu vakubisika munthowa yiheni. Venivi ndivu vinguchitika kali ukongwa mu tawuni ya Sodomu. Bayibolu likamba kuti ŵanthu a mutawuni yeniyi, “kwambiya anyamata mpaka arara,” akhumbanga kugonana ndi anthulumi wo ŵenga alendu aku Loti.—Genezesi 19:4, 5.

Wakumbuka kuti Chiuta wanguvikiliya Yesu? Kukayika cha kuti nawi wakuvikiliyengi ku ŵanthu arara ndipuso ŵana wo angakhumba kugonana nawi. Kanandi ŵanthu ŵenaŵa apusikiziya kuja nge anyaku pamwenga nge kuti atikuyanja. Angakamba so kuti akupaskengi chinthu chinyaki asani ungawalayizga kuti ukambiyengi munthu weyosi cha vo apenja kuchita nawi. Kweni ŵanthu ŵenaŵa mbakujiyanja nge Satana ndi viŵanda vaki. Yiwu akhumba waka kukondwesa mtima wawu pe, ndichu chifukwa chaki agonana ndi ŵana. Kweni kuchita venivi nkhuheni!

Kumbi waviziŵa vo angachita kuti akondwesi mtima wawu?— Nyengu zinyaki angaseŵeresa viŵalu vaku vakubisika. Pamwenga angayamba kuyendesa viŵalu vawu vakubisika pa liŵavu laku kuti vikwaskani ndi viŵalu vaku vakubisika. Kweni ungazomerezanga cha kuti munthu weyosi wakuseŵeresengi viŵalu vaku vakubisika. Kwali wangaŵa mzichi waku, ama ŵaku pamwenga ada ŵaku.

Kumbi ungachita wuli kuti uvikiliyi liŵavu laku ku ŵanthu aheni wo achita vinthu venivi?— Chakwamba, ungazomerezanga cha kuti munthu weyosi wakuseŵeresengi viŵalu vaku vakubisika. Asani munthu munyaki wachita venivi, ukanengi mwanthazi ndi kudaniriza kuti: “Ndilekeni! Ndakukukambani!” Ndipu asani iyu watikukambiya kuti ndiwi wachitiska, ungamuvwiyanga cha. Chifukwa ndi boza. Ulutengi waka kuchikamba vo munthu yo wachitanga! Ukakambengi mbwenu chinanga wangakukambiya kuti ungachikambanga cha chifukwa vo mwachitanga vachisisi. Uthaŵengi ndi kuchikamba chinanga kuti munthu yo wangakunyengere kuti wakuguliyengi vinthu pamwenga kukuwofyeza.

Ukhumbika cha kuchita mantha, kweni uchitengi vinthu mwakuphwere. Asani apapi ŵaku atikukaniza kucheza ndi ŵanthu anyaki pamwenga kuluta kumalu nganyaki, uŵavwiyengi. Asani uchitengi viyo, ŵanthu aheni ŵenaŵa asoŵengi mpata wakuti akuchitiyi vinthu viheni.