CHIGAŴA 13
Mafumu Ngaheni ndi Ngamampha
Yisraele wagaŵikana. Mukuluta kwa nyengu mafumu nganandi ngawusanga Ayisraele ndipu anandi mwaku wo ŵenga ambula kugomezgeka. Yerusalemu wabwangandulika ndi Ababiloni
MWAKULINGANA ndi mo Yehova wangukambiya, Yisraele wangugaŵikana panyengu yo Solomoni wanguleka kusopa kwauneneska. Rehoboamu yo wenga mwana waki ndiyu wangusere ufumu kweni iyu wenga wankhaza. Chifukwa cha venivi, mafuku 10 nga Yisraele ngangugaruka ndipu ngangupanga ufumu wa kunkhondi wa Yisraele. Mafuku ngaŵi nganguja ngakugomezgeka ku ufumu wa munyumba yaku Davidi ku Yerusalemu, ndipu angupanga ufumu waku mwera wa Yuda.
Maufumu ngosi ngaŵi ngangukumana ndi masuzgu ngakulu chifukwa chakuti mafumu ngaki ngenga ngambula kugomezgeka ndipuso ngambula kuvwiya. Ufumu waku nkhondi wa Yisraele, wenga ndi masuzgu nganandi ukongwa kuluska ufumu wakumwera wa Yuda, chifukwa mafumu ngawu ngangwambisa kusopa kwaboza kwambiya pakwamba. Chinanga kuti mchimi Eliya ndi Elisha achitanga nchitu zakuziziswa ndipuso kuyuska akufwa, ŵanthu a ufumu wakunkhondi wa Yisraele angwamba so kuchita vinthu viheni. Ndipu pakumaliya paki, Chiuta wanguzomerezga kuti ufumu wakunkhondi ubwanganduliki ndi Asiriya.
Ufumu wa mafuku ngaŵi wa Yuda ungulutirizga kujaku kwa vyaka vakujumpha 100 kutuliya po ufumu wa mafuku 10 wa Yisraele ungumaliya, kweni nawuso ungulangika ndi Chiuta. Mafumu ngamanavi waka nga Yuda, nganguvwiya vo achimi aku Chiuta aŵatcheŵesanga ndipu angwesa kulongozga ŵanthu kuti awere kwaku Yehova. Mwakuyeruzgiyapu, Fumu Josiya yingwamba kutuzgamu angoza wo ŵanthu asopanga mu ufumu wa mafuku ngaŵi wa Yuda ndipu yingwamba kuzenga nyumba yakusopiyamu yaku Yehova. Buku la Marangu ngaku Chiuta lo linguperekeka kwaku Mosese lati lasanirika, Josiya wangukwaskika mtima ndipu pavuli paki wangwamba kugwira nchitu mwanthazi, yakunozga so nyumba yakusopiyamu yaku Yehova.
Chakuchitisa chitima chenga chakuti, fumu yo yingusere m’malu mwaku Josiya, yingulondo cha chakuwoniyapu chamampha cho fumu iyi yingulongo. Mwaviyo, Yehova wanguzomerezga kuti Ababulo athereski ufumu wa mafuku ngaŵi wa Yuda, ndi kubwanganduwa Yerusalemu ndipuso nyumba yakusopiyamu. Wo anguleka kubayika, angutoleke ku ukapolu ku Babiloni. Chiuta wangukambiya limu kuti amuja ku ukapolu kwa vyaka 70. Charu cha Yuda chinguja chambula ŵanthu vyaka vosi ivi, mpaka po mtundu wo unguzomerezgeke kuwere ku charu chawu ku Yerusalemu, nge mo Chiuta wangulayizgiya.
Pengavi so fumu yinyaki yakutuliya m’banja laku Davidi, yo yatingi yiwusengi mpaka kuzifika mu muwusu waku Mesiya, yo wenga Mtaski wakulayizgika. Mafumu nganandi ngo nganguwusa mu Yerusalemu kutuliya m’banja laku Davidi, ngangulongo kuti ŵanthu ambula kufikapu mbambula kwenere kuwusa. Ndi Mesiya pe yija yo wangawusa umampha. Ndichu chifukwa chaki Yehova wangukambiya mafumu ngakumaliya nga nyumba yaku Davidi, kuti: “Zuwa chilemba . . . mukaŵanga kanthu kakuwonekamo so cha mpaka po waza yo iyo ndiyo mweneko, kwaku iyo ndikachiperekanga.”—Ezekiele 21:26, 27.
—Nkhani iyi yatuliya pa 1 ndi 2 Ŵakaronga; 2 Mikoka chaputala 10 mpaka 36; Yeremiya 25:8-11.