Kuza Kwaku Mesiya

KUMBI Yehova wanguwovya ŵanthu kuti aziŵi Mesiya wakulayizgika? Hinya. Ŵanaŵaniyani vo Chiuta wanguchita. Pangujumpha vyaka pafufupi 400 ŵati amaliza kulemba Malemba nga Chiheberi. Mwali munyaki zina laki Mariya yo wajanga mu msumba wa Nazarete, wo wenga ku nkhondi kwa dera la Galile, wangulonde mulendu mwamabuchibuchi. M’ngelu zina laki Gabriele wanguwoneke kwaku Mariya ndipu wangumukambiya kuti, Chiuta wagwiriskiyengi nchitu nthazi yaki ya mzimu utuŵa wo uchitisengi kuti wabali mwana munthurumi chinanga kuti iyu wenga mwali wambula kuyirwa. Mwana uyu ndiyu watingi wajengi Fumu yo yingulayizgika kwa nyengu yitali, ndipuso yo yatingi yiziwusengi kwamuyaya. Mwana mwenuyu watingi wajengi Mwana waku Chiuta, yo Chiuta wangusamusiya umoyu waki kutuwa kuchanya kuchiwuŵika mumoyu mwaku Mariya.

Mariya wanguzomereza nchitu yakuzirwa yeniyi mwakujiyuyuwa. Yosefe yo wakhumbanga kutolana nayu nthengwa wenga kalipentala, ndipu iyu wangutolana ndi Mariya chifukwa chakuti Chiuta wangutumiza m’ngelu kuti wakakambiyi Yosefe kuti nthumbu yo yenga ndi Mariya, Chiuta ndiyu wanguchitisa mwakusamusiya umoyu wa Mwana waki ndi kuwuŵika mumoyu mwaku Mariya. Wuli nanga pakukamba za uchimi wo wakambanga kuti Mesiya wazamuwiya ku Betelehemu? (Mika 5:⁠2) Kutuwa mu msumba umana wa Betelehemu kuchifika ku Nazarete, penga mtunda wa makilomita 150.

Yo wawusanga charu cha Roma wangulangula kuti kuchitiki kalembela. Ŵanthu akhumbikanga kuchilembeske ku muzi kwawu ko akuwiya. Viwoneka kuti Yosefe ndi Mariya wenga a ku Betelehemu, mwaviyo, Yosefe ndi Mariya akhumbikanga kuti nawu aluti ku Betelehemu. (Luka 2:⁠3) Mariya wangubaliya mu khola, ndipu wangugoneka mwana waki mwakuryiya viŵetu. Chiuta wangutuma m’ngelu kuti wakakambiyi gulu la aliska wo ŵenga ku phiri kuti mwana yo wawaku ndi Mesiya wakulayizgika pamwenga kuti Khristu.

Pavuli paki, ŵanthu anyaki atingi achitiyengi ukaboni kuti Yesu wenga Mesiya wakulayizgika. Mchimi Yesaya wangukambiya limu kuti pazamukuŵa munthu yo wazamunozga nthowa kuti Mesiya wazichiti nchitu zakukhumbika ukongwa. (Yesaya 40:⁠3) Munthu yo wangusankhika kuti wanozgi nthowa yo, wenga Yohane Mbatizi. Iyu wati wawona Yesu, wangukamba mwakukweza kuti: “Awonani Mwanamberere waku Chiuta yo watuzgapu urakwi wa charu!” Akusambira anyaki aku Yohane angumulondo Yesu nyengu yeniyo. Yumoza waku yiwu wangukamba kuti, “Tamsaniya Mesiya.”​—⁠Yohane 1:​29, 36, 41.

Penga so ukaboni unyaki. Panyengu yo Yohane wabatizanga Yesu, Yehova wangukamba mazu kutuliya kuchanya. Mwakugwiriskiya nchitu mzimu utuŵa, Yehova wangusankha Yesu kuja Mesiya ndipu wangukamba kuti: “Mweniyo ndi Mwana wangu, nkhwanjiwa, mwakumweniyo ndikondwere.” (Mateyu 3:​16, 17) Uku ndiku kwenga kuza kwaku Mesiya yo wangulayizgika kwa nyengu yitali.

Kumbi venivi vinguchitika zukwanji? Mwenga m’chaka cha 29 C.E. vati vamala waka vyaka 483 vo Danyele wangukamba. Uwu wenga so ukaboni wakulongo kuti Yesu wenga Mesiya pamwenga Khristu. Kumbi ndi uthenga wuli wo iyu watingi wazipharazgengi panyengu yo wenga pacharu chapasi?

​—⁠Nkhani iyi yatuliya pa Mateyu chaputala 1 mpaka 3; Marko 1; Luka chaputala 2; Yohane chaputala 1.