Kumbi Mbayani wo Anguvwiya Ndipuso wo Anguleka Kuvwiya pa Nyengu ya Chigumula?

Ŵanthu anandi mu nyengu yaku Nowa achitanga vinthu viheni. Genezesi 6:5

Adamu ndi Heva ŵenga ndi ŵana ndipu venivi vinguchitiska kuti pacharu chapasi paje ŵanthu anandi. Pati pajumpha nyengu, angelu anyaki angugaruka ndipu angulondo Satana.

Yiwu anguza pacharu chapasi ndipu anguvwala maliŵavu nga umunthu kuti ato anthukazi. Anthukazi wo angubala ŵana akofya, wo ŵenga andewu ndipuso anthazi.

Charu chosi chinguzaza ndi ŵanthu wo achitanga vinthu viheni. Bayibolu likamba kuti: “Uheni wa ŵanthu wenga ukulu pacharu chapasi ndipuso kuti maŵanaŵanu ndi makhumbiru nga mtima wawu, ngenga ngaheni pe nyengu zosi.”

Nowa wanguvwiya Chiuta ndipu wangukhoma chingaraŵa. Genezesi 6:13, 14, 18, 19, 22

Nowa wenga munthu wamampha. Yehova wangukambiya Nowa kuti wanangengi ŵanthu aheni ndi chigumula.

Chiuta wangukambiya so Nowa kuti wakhomi chingaraŵa chikulu kuti iyu ndi banja laki aseremu ndipuso kuti waserezemu nyama zakupambanapambana.

Nowa watcheŵeskanga ŵanthu kuti kuzengi Chigumula, kweni avwiyanga cha. Ŵanthu anyaki amusekanga ndipu anyaki amutinkhanga.

Nowa wati wamala kukhoma chingaraŵa wanguserezamu vinyama.