SAMBIRU 21

Kumbi Beteli Ntchinthu Wuli?

Akaboni aku Yehva ŵaŵi agwira ntchitu ku Dipatimenti Yakujambula vithuzi pa Beteli — Dipatimenti Yakujambula vithuzi ku, U.S.A.

Kaboni waku Yehova wagwira ntchitu kumalu ngo asindikiziyaku mabuku ku Beteli ya ku Germany — Germany

Kaboni waku Yehova wagwira ntchitu kumalu ngo achapiya vakuvwala ku Bethel ya ku Kenya — Kenya

Abali wo agwira ntchitu muchipinda chakuryiya aŵika mbali pa thebulu ku Beteli ya ku Colombia — Colombia

Beteli ndi mazu nga Chiheberi ngo ngang’anamuwa kuti “Nyumba yaku Chiuta.” (Chiyambo 28:17, 19) Ma ofesi nga nthambi nga Akaboni aku Yehova ngo nge muvyaru vakupambanapambana pacharu chapasi, ngo ngatovya pakulongozga ntchitu yakupharazga ngakwenere kudanika zina lenili. Wupu Wakulongozga uteŵete ku likuru la pacharu chosi lo le ku America, ndipu kutuliya kweniko, wupu wenuwu uwonere ntchitu zo zichitika mu maofesi ngosi nga nthambi. Ŵanthu wo ateŵete mu maofesi nga nthambi, adanika kuti banja la Beteli. Nge banja, yiwu aja, agwira ntchitu, kurya ndi kusambira Bayibolu pamoza ndipuso mwakukoliyana.—Sumu 133:1.

Ŵanthu wo agwira ntchitu pa Beteli mbakujipereka. Pa Beteli yeyosi pe anthulumi ndi anthikazi achikhristu wo atijipereka pakuchita khumbu laku Chiuta ndi kugwira ntchitu ya Ufumu nyengu zosi. (Mateyu 6:33) Yiwu alonde malipiru cha kweni weyosi wapaskika chipinda chakugonamu, chakurya ndipuso ndalama zimanavi kuti zimuwovyengi pa vinthu vo wakhumba. Munthu weyosi yo we pa Beteli we ndi ntchitu yo wagwira, kaya ndi mu ofesi, ku khichini pamwenga muchipinda chakuryiya. Anyaki agwira ntchitu kumalu ngakusindikiziya mabuku, anozga munyumba, achapa vakuvwala, anozga vinthu vo vanangika ndipuso ntchitu zinyaki.

Ndi malu ngo ngatovya kulutisa panthazi ntchitu yakupharazga Ufumu. Ntchitu yikulu ukongwa pa Beteli nkhuwovya kuti uneneska wa m’Bayibolu ufikiyi ŵanthu anandi. Kabuku yaka ntchakuwoniyapu chimoza cha ntchitu zo zigwirika pa Beteli. Ndipu kakulembeka pasi pa ulongozgi wa Wupu Wakulongozga ndi kutumizika kuziya pa Intaneti kuluta ku magulu nganandi nga ŵanthu wo agwira ntchitu yakufwatuliya pacharu chosi. Pavuli paki kakusindikizika pa makina ngo ngasindikiza mabuku mwaliŵi ukongwa, ndipu makina yanga nge mu maofesi nga nthambi ngo ngagwira ntchitu yakusindikiza mabuku ndi kutumiza ku mipingu yakujumpha 110,000. Pa ntchitu zosi zo zichitika, banja la Beteli litovya ukongwa pa ntchitu yakukhumbika mwaliŵi kuluska ntchitu zosi, yakupharazga uthenga wamampha.—Mariko 13:10.

Kumbi mbayani wo ateŵete pa Beteli, nanga ndi vinthu wuli vo apaskika?
Kumbi banja la Beteli lelosi litovya pa ntchitu yakukhumbika ukongwa niyi?