Kumbi Akufwa Azamuja so ndi Umoyu?

VO BAYIBOLU LIKAMBA

“Kwazamuja chiyuka.”​—Machitidu 24:15, Bayibolu la Charu Chifya.

KUMBI VENIVI VING’ANAMUWANJI KWAKU YIMWI?

Mungapembuzgika asani mubali winu watayika.​—2 Akorinto 1:3, 4.

Muyiwopengi ukongwa cha nyifwa.​—Aheberi 2:15.

Mungaja ndi chilindizga chakuti mwazakuŵawona so abali ŵinu wo akutayika.​—Yohane 5:28, 29.

KUMBI TITENERE KUGOMEZGA VO BAYIBOLU LIKAMBA?

Hinya. Pe vifukwa vitatu vo titenere kuchitiya viyo:

• Chiuta ndiyu Mlengi wa umoyu. Bayibolu likamba kuti Yehova Chiuta ndiyu “chisimi cha umoyu.” (Salimo 36:9; Machitidu 17:24, 25) Iyu wangatondeka cha kuweziyapu umoyu wa munthu yo wafwa. Tikamba viyo chifukwa ndiyu wakupereka umoyu ku vinthu vosi vamoyu.

• Chiuta wanguyuskapu ŵanthu mu nyengu yakali. Bayibolu lizumbuwa ŵanthu 8 wo anguyuskika pacharu chapasi. Pa ŵanthu yaŵa penga anamana, arara, anthulumi ndi anthukazi. Anyaki anguyuskika pati pajumpha kanyengu kamanavi kutuliya po angufwiya kweni yumoza wanguyuskika pati pajumpha mazuŵa nganayi!​—Yohane 11:39-44.

• Chiuta wakhumbisiska kuziyuska so ŵanthu. Yehova watinkha nyifwa ndipu watiyiwona kuti ndi murwani. (1 Akorinto 15:26) Iyu wakhumbisiska kumuthereska murwani mwenuyu, kung’anamuwa kuti watuzgengepu nyifwa mwakuyuska wo akufwa. Wakhumba kuweziyapu umoyu wa ŵanthu wosi wo watiŵakumbuka kuti azije so pacharu chapasi.​—Yobu 14:14, 15.