Rebeka Wakhumbanga Kukondweska Yehova

Rebeka wenga munthukazi wakwanja Yehova. Murumu waki wenga Yisaki. Nayu so wayanjanga Yehova. Kumbi Rebeka wanguziŵana wuli ndi Yisaki? Kumbi wangulongo wuli kuti wakhumbanga kukondweska Yehova? Tiyi tisambiri vinandi vakukwaskana ndi Rebeka.

Apapi aku Yisaki ŵenga Abrahamu ndi Sara. Wosi ajanga m’charu cha Kanani, ndipu ŵanthu akweniko asopanga Yehova cha. Kweni Abrahamu wakhumbanga kuti mwana waki wato munthukazi wakopa Yehova. Mwaviyo, wangutuma mteŵeti waki, yo watenere kuti wenga Eliezere, kuti wakasaniriyi Yisaki munthukazi ku Harani. Kwenuku ndiku kwajanga abali aku Abrahamu.

Eliezere wanguluta ndi ateŵeti anyaki. Uwu wenga ulendu utali ukongwa. Yiwu anguluta ndi ngamila 10 zo zingupinga vakurya ndi vawanangwa. Kumbi Eliezere watingi wamuziŵengi wuli munthukazi wakwenere kutorana ndi Yisaki? Eliezere ndi ateŵeti anyaki ŵati afika ku Harani, anguma pa chisimi chifukwa Eliezere wanguziŵa kuti ŵanthu ŵe pafupi kuza kuzineŵa maji. Iyu wanguromba kwaku Yehova kuti: ‘Munthukazi yo ndimupemphengi maji ndipu asani wandipaska kuti ndimwi ndi ngamila zangu, ndiziŵengi kuti mweniyo ndiyu imwi mwasankha.’

Pavuli paki Rebeka wanguza kuchisimi. Bayibolo likamba kuti wenga wakutowa ukongwa. Eliezere wangumupempha maji ngakumwa ndipu Rebeka wanguti: ‘Mwani, ndamuneŵe so ngamila zinu.’ Ngamila zitumwa maji nganandi ukongwa asani ze ndi nyota. Mwaviyo, Rebeka wakhumbikanga kuweriyaku kananandi ŵaka kuchisimi. Asi wamuwona pa chithuzi mo wagwiriya nchitu?— Eliezere wanguzizwa ukongwa ndi mo Yehova wangumukiya rombu laki.

Eliezere wangupaska Rebeka vawanangwa vinandi vakutowa. Rebeka wangudana Eliezere ndi ateŵeti anyaki kuti aluti kunyumba kwawu. Eliezere wangukonkhoska chifukwa cho Abrahamu wangumutumiya ku Harani ndipuso mo Yehova wangumukiya rombu laki. Abali aku Rebeka angukondwa kuti watorani ndi Yisaki.

Kumbi uŵanaŵana kuti Rebeka wakhumbanga nadi kutorana ndi Yisaki?— Rebeka wanguziŵa kuti Yehova ndiyu wangutuma Eliezere kuti wazi kwaku yiyu. Sonu abali ŵaki ŵati amufumba kuti aziŵi asani walutengi nadi ku Kanani kuti wakatorani ndi Yisaki, Rebeka wangumuka kuti, “Ndirutengi.” Iyu wangusoka nyengu yeniyo ndi Eliezere. Wati wafika ku Kanani wangutorana ndi Yisaki.

Yehova wangutumbika Rebeka chifukwa wanguchita vo Iyu wakhumbanga. Pati pajumba vyaka vinandi, Yesu wanguziwiya m’mzeri wa banja laku Rebeka. Yehova wakutumbikengi asani nawi ujengi nge Rebeka ndipuso asani utimukondweska.