Yesu Wavwiyanga Nyengu Zosi

Kumbi uwona kuti kuvwiya apapi ŵaku nyengu zosi nkhupusu?— Nyengu zinyaki nkhwakusuzga. Kumbi uziŵa kuti Yesu wavwiyanga Yehova ndipuso apapi ŵaki?— Chakuwoniyapu chaki chingakuwovya kuti uvwiyengi apapi ŵaku chinanga mphanyengu yakusuzga. Tiyi tisambiri vinandi vakukwaskana ndi nkhani iyi.

Yesu wechendazi pacharu cha pasi, wenga ndi Awiski kuchanya. Kweni Yesu wenga so ndi apapi pacharu chapasi. Apapi ŵaki ŵenga Yosefe ndi Mariya. Kumbi uziŵa mo vingwende kuti aje apapi aku Yesu?—

Yehova wangusamusa umoyu waku Yesu kuchanya ndipu wanguwuŵika mumoyu mwaku Mariya kuti Yesu wabaliki ndi kuja pacharu chapasi. Ichi chenga chakuziziswa! Yesu wangukuwa mumoyu mwaku Mariya nge mo ŵana wosi akuliya mumoyu mwa anyinawu. Yesu wanguwaku pati pajumpha myezi 9. Umu ndimu vingwende kuti Mariya ndi Yosefe aje apapi aku Yesu pacharu chapasi.

Pa nyengu yo Yesu wenga ndi vyaka 12, wanguchita chinthu chinyaki cho chingulongo kuti wayanjanga ukongwa Yehova, Awiski a kuchanya. Ivi vinguchitika pa nyengu yo ŵanthu a m’banja laku Yesu angwenda ulendu utali kuluta ku Yerusalemu kuchichita Phaska. Pakuwe, Yosefe ndi Mariya angusaniya kuti Yesu palivi. Kumbi uziŵa ko wenga?—

Yosefe ndi Mariya anguwere so ku Yerusalemu mwaliŵi kuti akamupenji. Yiwu angudandawula ukongwa chifukwa amuwonanga cha. Kweni pati pajumpha mazuŵa ngatatu, angumusaniya kuti we mu nyumba yakusopiyamu. Kumbi wachiziŵa chifukwa cho Yesu wangujaliya panyumba yakusopiyamu?— Chifukwa chakuti kwenuku ndiku wasambiranga vakukwaskana ndi Yehova, Awiski a kuchanya. Iyu wayanjanga ukongwa Yehova ndipu wakhumbisiskanga kumukondweska. Yesu wati wakuwa, wangulutirizga kuvwiya Yehova. Iyu wavwiyanga Yehova chinanga mphanyengu yakusuzga. Kumbi Yesu wavwiyanga so Yosefe ndi Mariya?— Hinya, Bayibolo likamba kuti wavwiyanga.

Kumbi ungasambiranji kwaku Yesu?— Utenere kuvwiya apapi ŵaku chinanga mphanyengu yakusuzga. Kumbi ndivu uchitengi?—