Akulemba Vakukwaskana ndi Yesu

Kumbi waŵawona ŵanthu wo ŵe pachithuzi yapa?— Ŵanthu yaŵa ndi Mateyu, Marko, Luka, Yohane, Petro, Yakobe, Yuda ndi Paulo. Ŵanthu wosi yaŵa ŵengaku mnyengu yaku Yesu ndipu akulemba vakukwaskana ndi iyu. Tiyi tisambiri vakukwaskana ndi yiwu.

Ŵatatu mwa ŵanthu yaŵa ŵenga akutumika wo apharazgiyanga limoza ndi Yesu. Kumbi waŵaziŵa ŵanthu ŵaki?— Ndi Mateyu, Yohane kweniso Petro. Mateyu ndi Yohane amuziŵanga ukongwa Yesu, ndipu weyosi waku yiwu wakulemba buku lakukonkhoska umoyu waku Yesu. Yohane wakulemba so buku lo lidanika kuti Chivumbuzi kweniso makalata ngatatu ngo ngadanika kuti 1 Yohane, 2 Yohane ndi 3 Yohane. Petro wakulemba makalata ngo nge m’Bayibolo. Makalata yanga ngadanika kuti 1 Petro ndi 2 Petro. Mukalata yaki yachiŵi, Petro wakulemba vo Yehova wangukamba kutuliya kuchanya vakukwaskana ndi Yesu kuti: ‘Mwenuyu ndi Mwana wangu wakwanjiwa, ndipu ndikondwa nayu.’

Ŵanthu anyaki wo ŵe pachithuzi nawu atitisambiza vakukwaskana ndi Yesu m’mabuku ngo akulemba. Yumoza waku yiwu ndi Marko. Watenere kuti wengapu pa nyengu yo Yesu wamangikanga ndipu wanguwona vosi vo vachitikanga. Munyaki ndi Luka. Iyu wenga dokotala ndipu watenere kuti wanguja Mkhristu Yesu wati wafwa.

Ŵanthu anyaki ŵaŵi wo akulemba Bayibolo wo utiŵawona pachithuzi, ŵenga avurwa aku Yesu. Kumbi utingaziŵa mazina ngawu?— Ndi Yakobe ndi Yuda. Pakwamba, yiwu amugomezganga cha Yesu. Yiwu aŵanaŵananga kuti Yesu wazerezeka. Kweni pavuli paki angwamba kugomezga Yesu ndipu anguja Akhristu.

Munthu wakumaliya yo wakulembaku Bayibolo yo utimuwona pachithuzi ndi Paulo. Wechendaje Mkhristu, wadanikanga kuti Saulo. Iyu watinkhanga Akhristu ndipu walimbananga nawu ukongwa. Kumbi utichiziŵa cho chinguchitiska kuti Paulo waje Mkhristu?— Zuŵa linyaki Paulo wayendanga mumsewu ndipu wanguvwa mazu nga munthu munyaki wachilongoro kutuliya kuchanya. Munthu uyu wenga Yesu! Iyu wangufumba Paulo kuti: ‘Nchifukwa wuli ulimbana ndi ŵanthu wo atindigomezga?’ Penapa ndipu Paulo wangusinthiya kuja Mkhristu. Paulo wakulemba mabuku 14 nga m’Bayibolo, kwambiya buku la Ŵaroma mpaka Ŵahebere.

Kumbi wayambapu kuŵerenga wija pamwenga munthu munyaki wayambapu kukuŵerenge mabuku nga m’Bayibolo ngo ngakonkhoska vakukwaskana ndi Yesu?— Kwamba kusambira vakukwaskana ndi Yesu ndichu chimoza mwa vinthu vakukhumbika ukongwa vo utenere kuchita. Kumbi ndivu uchitengi?—