Masambiru nga Ufumu​—Kusambiza Ateŵeti a Fumu

TIYERUZGIYI kuti musekere m’bali wampupuka wa mumpingu winu wachikamba nkhani pa pulatifomu. Iyi ndi nkhani yaki yakwamba pa unganu uwu. Muchivwisiya nkhani yaki yakuyanduliska, muwonga masambiru ngo ŵanthu aku Chiuta alonde. Mukumbuka nyengu yo wangukamba nkhani kakwamba ndipu muwona mo walutiya panthazi! Iyu wakusambizika mu Sukulu ya Uteŵeti Waku Chiuta kweniso Sukulu ya Uteŵeti wa Upayiniya. Ndipu pambula kuswera yapa, iyu ndi muwolu waki angusere Sukulu ya Apharazgi a Ufumu. Muchimba m’manja chifukwa cha nkhani yakukondweska ya m’bali uyu, mulereska ŵanthu wo ŵe pa unganu ndipu mukumbuka masambiru ngo ŵanthu wosi aku Chiuta alonde.

Bayibolo likukambiya limu nyengu yo ŵanthu wosi aku Chiuta “akasambizikanga ndi Ambuya.” (Yes. 54:13) Isi te m’nyengu yeniyi. Tisambizika kuporote m’mabuku, m’maunganu nga mpingu, ngadera, ngapade, nga chigaŵa kweniso m’ma sukulu ngakupambanapambana ngo ngatitiwovya kuti tifiski uteŵeti m’gulu laku Yehova. M’chigaŵa ichi tiwonengi mo masambiru ngenanga ngapereke ukaboni wakuti Ufumu waku Chiuta uwusa mazuŵa nganu.