CHIGAŴA 3
Mo Mungamaliskiya Masuzgu
“Muŵi ndi chanju chakufikapu mwaku mwaŵeni, pakuti chanju chivimba muru wa vilakwa.”—1 Petro 4:8
Asani mwayamba umoyu wa banja, mukumanengi ndi masuzgu ngakupambanapambana. Ivi vichitikengi chifukwa chakuti mupambana mo muŵanaŵaniya, mo muvwiya ndipuso mo muchitiya vinthu. Nyengu zinyaki masuzgu ngatuliyengi ku ŵanthu anyaki pamwenga vakuchitika vinyaki vamabuchibuchi.
Asani mwaziŵa kuti mukumanengi ndi masuzgu, mukhoza kufipa mtima kweni Bayibolo lititikambiya kuti tiyesesengi kungamaliska. (Mateyu 5:23, 24) Kugwiriskiya nchitu fundu za m’Bayibolo kungakuwovyani kuti musaniyi nthowa zamampha ukongwa zakumaliskiya masuzgu.
1 MUKAMBISKANENGI
VO BAYIBOLO LIKAMBA: Pe “nyengu yakulongoro.” (Wakutaula 3:1, 7) Yesesani kusaniya nyengu yakukambiskiyana suzgu lo lilipu. Konkhoskani mwakufwatuka mo muvwiya kweniso maŵanaŵanu nginu pa nkhani yo. “Kambiranani uneneska” nyengu zosi ndi munthu yo mukutolana nayu. (Ŵaefesu 4:25) Chinanga kuti mungafya mtima, yesesani kujiko kuti muleki kupindana. Kumuka mwakufwasa kutovya kuti nkhani yo mukambiskana yileki kwambisa mphindanu.—Nthanthi 15:4; 26:20.
Chinanga kuti muleki kukolerana ndi vo munyinu wakamba, mutenere kuchita vinthu mwachanju kweniso mwaulemu. (Ŵakolose 4:6) Muyesesengi kumaliska liŵi mphindanu ndipu mungalekanga cha kukambiskana chifukwa chakuti mwaguŵiskana.—Ŵaefesu 4:26.
VO MUNGACHITA:
Sankhani nyengu yakwenere yakukambiskiyana suzgu lo
Asani munyinu ndiyu wakonkhoska, muvwisiyeni ndipu kumudumulizga cha mpaka wamalizi. Nyengu yakuti namwi mulongoropu yikwanengi
2 MUVWISIYENGI NDI KUVWISISA
VO BAYIBOLO LIKAMBA: “Jani ndi chanju chauneneska pakati pinu. Pakulongorana ulemu jani panthazi.” (Ŵaroma 12:10, NW) Muvwisiyengi ndi chilatu chakukhumba kutopu fundu pa vo munyinu wakonkhoska ndipu muchitengi ivi ndi “mitima yakujiyuyuwa.” (1 Petro 3:8; Yakobe 1:19) Muvwisiyengi ndi mtima wosi, kuchitiya ŵaka kuti nkhani yimalepu cha. Asani mungafiska, mulekezgengi dankha vo muchita ndi kuvwisiya vo munyinu wakamba pamwenga mungamupempha kuti mukambiskani nyengu yinyaki. Asani munthu yo mukutolana nayu mumuwonengi nge mubwezi winu, vikuwovyeningi kuti muleki kuja ndi mtima ‘wakukwiya liŵi.’—Wakutaula 7:9.
VO MUNGACHITA:
Lutirizgani kuvwisiya ndi mtima wosi chinanga kuti vo munyinu wakonkhoska vitikukondweskani cha
Muvwisiyengi ndi chilatu chakukhumba kutopu fundu pa vo munyinu wakonkhoska. Muwonengi mo wagwiriskiya nchitu manja ndi chisku pakulongoro kweniso mo watuzgiya mazu
3 MUCHITENGI VO MWASANKHA
VO BAYIBOLO LIKAMBA: “Mu kutakataka kosi mwe chanduwu, kweni kulongoro ŵaka kupaska ŵaka kukhumbira.” (Nthanthi 14:23) M’malu mwakuvwanana ŵaka pa fundu yinyaki, muyesesengi kuchita vo mwasankhiya limoza. Kuchita ivi kukhumbika phamphu, kweni pakumaliya paki muyanduwengi ukongwa. (Nthanthi 10:4) Asani mungachita vinthu mwakukoliyana, muŵengi ndi “mphotu yamampha.”—Wakutaula 4:9.
VO MUNGACHITA:
Sankhani vo weyosi wangachita kuti wamaliski suzgu lo mwakumana nalu
Nyengu zosi muwonengi asani musintha nadi