Yesu Wenga Wakujipereka pa Kusopa Kwauneneska

Wati watuwa ku zowala za ku Kana, Yesu wanguluta ku Kaperenao. Pa ulendu uwu, Yesu wenga ndi anyina, avurwa ŵaki Yakobe, Yosefi, Simoni ndi Yudasi.

Ntchifukwa wuli Yesu wanguluta ku Kaperenao? Tawuni iyi, yenga yikulu ndipuso yakuziŵika kuluska tawuni ya Nazareti ndi ya Kana. Kweniso akusambira anandi aku Yesu ajanga ku Kaperenao kwenuku pamwenga kufupi ndi tawuni yeniyi. Mwaviyo, Yesu watingi waŵasambizengi vinthu vinyaki ŵe kwawu.

Pa nyengu yo Yesu wenga ku Kaperenao wanguchita so vakuziziswa. Mwaviyo, ŵanthu anandi a muchigaŵa chenichi kweniso a vigaŵa vinyaki vakufupi anguvwa vo Yesu wachitanga ku Kaperenao. Kweni Yesu ndi akusambira ŵaki wo ŵenga Ayuda akujipereka angujalisaku cha ku Kaperenao. Yiwu anguluta ku Yerusalemu kuti akachiti nawu Pasika mu chaka cha 30 C.E.

Ŵati afika kunyumba yakusopiyamu ku Yerusalemu, akusambira aku Yesu anguwona Yesu wachichita vinthu vakuziziswa ukongwa vo ŵenga ŵechendaviwonepu.

Dangu laku Chiuta lakambanga kuti Ayisirayeli akhumbikanga kupereka sembi za nyama panyumba yakusopiyamu. Kweni penga ŵanthu anyaki wo atuliyanga kutali ndipu akhumbikanga kugula chakurya pa nyengu yosi yo ajaliyanga ku Yerusalemu. Mwaviyo, Dangu lazomerezanga ŵanthu ŵenaŵa kupinga ndalama kuti akaguliyengi “ng’ombi, mbereri, mbuzi” ndipuso vinthu vinyaki vakukhumbika. (Marangu 14:24-26) Chifukwa cha venivi, amalonda a ku Yerusalemu agulisanga nyama pamwenga tiyuni mubalaza la nyumba yakusopiyamu. Ndipu anyaki mwa amalonda ŵenaŵa abiyanga ŵanthu mwakuŵagulisa vinthu mwakudula ukongwa.

Yesu wati wawona venivi wangukwiya ukongwa ndipu wangudira ndalama za ŵanthu akusintha ndalama ndi kugudubuwa mathebulu ngawu, kweniso wanguŵadikisa wosi. Pavuli paki, Yesu wangukamba kuti: “Tuzganimu ivi munu! Nyumba ya Ada lekani kuyisambusa nyumba yamalonda!”—Yohane 2:16.

Akusambira ŵati awona vo Yesu wanguchita, angukumbuka uchimi wakukwaskana ndi Mwana waku Chiuta wakuti: “Phamphu la panyumba yinu lazakundirya.” Kweni Ayuda angufumba kuti: “Pakuti uchita vinthu ivi, kumbi ungatilongo chisimikizu cho uchitiya venivi?” Yesu wanguŵamuka kuti: “Wisiyani pasi nyumba yakusopiyamu iyi, ndipu ndiyizengengi so mu mazuŵa ngatatu.”—Yohane 2:17-19; Sumu 69:9.

Ayuda aŵanaŵananga kuti Yesu wakambanga nyumba yakusopiyamu chayiyu yo yenga ku Yerusalemu. Mwaviyo, angufumba kuti: “Nyumba yakusopiyamu iyi yinguzengeka kwa vyaka 46, mbwenu yiwi ungayizenga mu mazuŵa ngatatu?” (Yohane 2:20) Kweni Yesu wakambanga liŵavu laki kuti ndilu lenga nge nyumba yakusopiyamu. Pati pajumpha vyaka vitatu, akusambira ŵaki angukumbuka mazu ngenanga Yesu wati wayuskika.