Yesu Wangusankha Akutumika 12

Pangujumpha chaka chimoza ndi hafu kutuliya po Yohane Mubatizi wangukambiya ŵanthu kuti Yesu ndi Mwanawambereri waku Chiuta. Yesu wati wayamba upharazgi waki, ŵanthu anyaki a mtima wamampha anguja akusambira ŵaki. Ŵanthu yaŵa ŵenga Andireya, Simoni Peturo, Yohane, panyaki so ndi Yakobe (mvurwa waku Yohane), Filipu ndi Batolomeyu (yo waziŵikanga so kuti Natanayeli). Pati pajumpha nyengu, ŵanthu anyaki so anandi anguja akusambira aku Khristu.—Yohane 1:45-47.

Sonu Yesu wenga wakunozgeka kuti wasankhi akutumika. Akutumika ŵenaŵa ndiwu anguzija mabwezi nga pa mtima ngaku Yesu kweniso wanguŵasambiza mwapade mo angapharazgiya. Kweni wechendaŵasankhi, Yesu wanguluta ku phiri, panyaki phiri lo lenga pafupi ndi Nyanja ya Galileya kufupi ndi Kaperenao. Iyu wanguja kweniko usiku wosi wachipemphera ndipu watenere kuti wapemphanga zeru kweniso kuti Chiuta wamutumbiki. Mawa laki, wangudana akusambira ŵaki ndipu wangusankhapu ŵanthu 12 kuti aje akutumika.

Yesu wangusankha akusambira ŵaki 6 wo azumbulika kukwamba kwa nkhani iyi, kusazgapu Mateyu yo Yesu wangumudana mu ofesi ya msonkhu. Akusambira anyaki 5 wo angusankhika ŵenga Yudasi (yo waziŵikanga so kuti Tadeyu kweniso wenga “mwana waku Yakobe”), Simoni Kananiya, Tomasi mwana waku Alifeyu, ndipuso Yudasi wa ku Keriyoti.—Mateyu 10:2-4; Luka 6:16.

Kufika pa nyengu iyi, ndipu Yesu wayenda ndi akusambira ŵaki 12 kwa kanyengu. Mwaviyo, watenere kuti waŵaziŵanga umampha. Anandi mwa akusambira ŵaki, ŵenga abali ŵaki. Yakobe ndi Yohane ŵenga avurwa ŵaki. Ndipuso asani vo ŵanthu anyaki akamba vauneneska kuti Alifeyo wenga mvurwa waku Yosefi wo ŵenga awisi aku Yesu, ndikuti Yakobe yo wenga mwana waku Alifeyo, wenga mvurwa waku Yesu.

Yesu wasuzgikanga cha kukumbuka mazina nga akutumika ŵaki. Kumbi namwi mungakumbuka mazina ngawu? Cho chingakuwovyani nkhukumbuka kuti akutumika ŵaŵi adanikanga kuti Simoni, ŵaŵi adanikanga kuti Yakobe kweniso ŵaŵi adanikanga kuti Yudasi. Simoni (Peturo) wenga ndi mvurwa waki Andireya, ndipu Yakobe (mwana waku Zebediya) wenga ndi mvurwa waki Yohane. Venivi vingakuwovyani kukumbuka mazina nga akutumika 8 aku Yesu. Akutumika anyaki anayi ŵenga Mateyu (yo wenga wakusonkhesa msonkhu), Tomasi (yo pavuli paki wangukayikiya kuti Yesu wayuskika), Natanayeli (yo wangudanika pa nyengu yo wanguja pasi pa chimiti) ndipuso Filipu (mubwezi waku Natanayeli).

Akutumika 11 ŵenga a ku Galileya kwawu kwaku Yesu. Natanayeli wenga wa ku Kana. Filipu, Peturo ndipuso Andireya ŵenga a ku Betisayida. Pavuli paki, Peturo ndi Andireya angusamiya ku Kaperenao ko Mateyu wajanga. Yakobe ndi Yohane atenere kuti ajanga ku Kaperenao pamwenga kufupi ndi kwenuku, ndipu achitanga ulovi chapafupi. Viwoneka kuti Yudasi wa ku Keriyoti yo wanguzipereka Yesu ndiyu yija wenga wa ku Yudeya.