Yesu Wanguchenya Afarisi

Alembi ndi Afarisi atingi ambikengi mulandu wakubudiya mzimu waku Chiuta, chifukwa asuskanga kuti Yesu watuzganga viŵanda mu nthazi yaku Chiuta. Kumbi yiwu ŵenga kuchigaŵa chaku yani, Chiuta pamwenga Satana? Yesu wangukamba kuti: “Muchitiska chimiti kuti chiŵi chamampha kweniso vipasu vaki kuti viŵi vamampha, pamwenga muchitiska chimiti kuti chiŵi chiheni kweniso vipasu vaki kuti viŵi viheni, chifukwa chimiti chiziŵika ndi vipasu vaki.”—Mateyu 12:33.

Kukamba uneneska, nkhunanga kukamba kuti Yesu watuzganga viŵanda mu nthazi yaku Satana. Yesu wangukamba mwambula kubisa pa Upharazgi waki wa Paphiri kuti asani chimiti chabala vipasu vamampha, ndikuti chimiti cho ntchakuvunda cha kweni ntchamampha. Mwaviyo, vo Afarisi akambanga pa kunyoza Yesu, vo tingaviyeruzgiya ndi vipasu, vingulongo kuti yiwu ŵenga akuvunda. Yesu wanguŵakambiya kuti: “Ŵana a njoka yimwi! Mungakamba wuli vinthu vamampha penipo mwe aheni? Chifukwa mulomu ulongoro vo vazaza mumtima.”—Mateyu 7:16, 17; 12:34.

Mwaviyo, vinthu vo tikamba vilongo vo ve mumtima mwidu ndipu vingachitiska kuti tizitaskiki pamwenga cha. Ndichu chifukwa chaki Yesu wangukamba kuti: “Nditikukambiyani kuti pa Zuŵa la Cheruzgu, ŵanthu azamumbika mulandu pa vinthu viheni vevosi vo alongoro; pakuti mwazamuyeruzgika kuti mwe arunji chifukwa cha mazu nginu kweniso mwazamuyeruzgika kuti mwe aheni chifukwa cha mazu nginu.”—Mateyu 12:36, 37.

Chinanga kuti Yesu wachitanga vakuziziswa vinandi, kweni alembi ndi Afarisi akhumbanga kuti Yesu wachiti vinthu vinyaki kuphara vo wachitanga. Yiwu angukambiya Yesu kuti: “Msambizi, tikhumba kuti mutilongo chisimikizu chakulongo kuti Chiuta ndiyu wakukutumani.” Kwali yiwu angumuwona wachichita vakuziziswa pamwenga cha, kweni penga maukaboni ngambula kususkika ngakulongo vo iyu wachitanga. Mwaviyo, Yesu wangukambiya alongozgi Achiyuda ŵenaŵa kuti: “Mugonezi uheni kweniso wachigololu ulutirizga kupenja chisimikizu kweni palivi chisimikizu chinyaki cho upaskikengi kupatuwaku chaku Yona, mchimi.”—Mateyu 12:38, 39.

Yesu wanguŵakonkhoske vo iyu wang’anamuwanga. Iyu wanguti: “Nge mo Yona wangujaliya mumoyu mwa chisomba chikulu kwa mazuŵa ngatatu, msana ndi usiku, Mwana wa munthu nayu wazamuja mumtima wa charu kwa mazuŵa ngatatu, msana ndi usiku.” Yona wangumezeka ndi chisomba chikulu ndipu pavuli paki wangutuwa mumoyu mwa chisomba chenichi vo venga nge kuti wayuskika. Yapa, Yesu wangukambiya limu kuti wazamubayika ndipu pa zuŵa la chitatu wazamuyuskika. Venivi vati vachitika, alongozgi Achiyuda angukana ‘chisimikizu chaku Yona.’ Yiwu angukana kulapa ndipuso kusintha. (Mateyu 27:63-66; 28:12-15) Mwakupambana ndi alongozgi ŵenaŵa, “ŵanthu a ku Nineve” angulapa ŵati ŵavwa uthenga wo Yona wanguŵapharazgiya. Mwaviyo, ŵanthu aku Nineve azakuwususka mugonezi wenuwu. Yesu wangukamba so kuti Fumukazi ya ku Sheba yazakuwususka. Fumukazi yeniyi yingukhumbisiska kuvwa vakukwaskana ndi zeru zaku Solomoni. Ndipu Yesu wangukamba kuti: “Munthu munyaki wakuluska Solomoni we panu.”—Mateyu 12:40-42.

Yesu wanguyeruzgiya mugonezi uheni wenuwu ndi munthu yo wangutuzgika mzimu uheni. (Mateyu 12:45) Chifukwa chakuti munthu mwenuyu wangutondeka kuŵikamu vinthu vamampha mumtima waki, mzimu uheni unguwere so mwaku iyu ndi mizimu yinyaki 7 yiheni ukongwa. Mwakuyanana ŵaka, Ayisirayeli angutoweskeka nge po munthu yo wenga ndi mzimu uheni wanguchitiya. Kweni yiwu angukana achimi aku Chiuta, ndipu pakumaliya paki angukana Yesu yo wawonekiyanga limu kuti walongozgekanga ndi mzimu waku Chiuta. Venivi vilongo kuti mtundu wenuwu wenga uheni ukongwa kuluska po wenge pakwamba.

Yesu wachilongoro, anyina ndi abali ŵaki anguza ndipu anguma kuvuli kwa gulu la ŵanthu. Ŵanthu anyaki wo anguja nayu pafupi angumukambiya kuti: “Anyinamwi ndi avurwa ŵinu ama kubwalu, akhumba kuwonana namwi.” Pavuli paki, Yesu wangulongo kuti wayanjanga ukongwa akusambira ŵaki. Iyu wangukamba kuti: “Ama ndi avurwa ŵangu ndi yaŵa, wo atuvwa mazu ngaku Chiuta ndi kungachita.” (Luka 8:20, 21) Iyu wangulongo kuti chinanga kuti wakoliyananga ukongwa ndi abali ŵaki, kweni wawonanga kuti ubali wo wenga nawu ndi akusambira ŵaki ndiwu wenga wakuzirwa ukongwa. Venivi, vilongo kuti nasi tikhumbika kuyanjana ukongwa ndi abali kweniso azichi achikhristu, ukongwa pa nyengu yo ŵanthu anyaki atitikayikiya, atitinyoza kweniso anyoza vinthu vamampha vo tichita.